كود سبور//

طاحو الرجاء الرياضي فالخسران مع شباب السوالم، اليوم الجمعة فتيران برشيد برسم الدورة 6 من البطولة الاحترافية لكرة القدم، فأول ماتش للمدرب الجديد ديال الخضرا ريكاردو سا بينتو، وهو الماتش اللي غاب عليه مدرب السوالم رضوان الحيمر حيث مات له باه.

وسالا ماتش الرجاء الرياضي وشباب السوالم بنتيجة 2 لواحد لمصلحة السوالم، وتسناو الفراقي بجوجهم الشوط الثاني باش يماركيو، والرجا اللي سجلو الاولين بواسطة محمد زريدة فالدقيقة 50، قبل ما يماركيو السوالم التعادل بواسطة توفيق رازقو، ومن وراها زادو ماركاو السوالم الهدف الثاني ديال الرباح بواسطة محمد الخلوي فللحظات الأخيرة من الماتش.

وبهذه الخسارة بقات عند الرجاء الرياضي 9 النقاط والفريق مشات له الصدارة ومهدد باش يتراجع فالترتيب بعد هذه الدورة، وهادي الخسارة الثالثة للفريق فهاد الموسم، اما السوالم حتى هما ولات عندهم 9 نقاط ومحتلين المركز السادس مؤقتا.