كود – وكالات//

فمبادرة فنية وإنسانية، كاينة فرصة عند عشاق الفن ديال بيكاسو باش يربحو طابلو دوريجين ديال بابلو بيكاسو غير بـ100 يورو، اللوحات لي اسمها“ رأس امرأة” (Tête de Femme) ترسمات عام 1941، وكتعتبر من الأعمال اللي كتعكس المرحلة الصعيبة اللي داز منها الفنان فالحرب العالمية الثانية.

المنظمين خرجو 120 ألف تكيت، وغادي يتدار السحب ديالها فـ14 أبريل، وسط اهتمام كبير من المشاركين، لي زوين فهاد المبادرة ماشي غير قيمة الجائزة، ولكن حتى الهدف ديالها، حيث العائدات كاملة غادي تمشي لدعم مؤسسة أبحاث الزهايمر، باش يعاونو فتمويل الأبحاث والدراسات السريرية المرتبطة بهاد المرض اللي كيأثر على الملايين.

الطابلو “رأس امرأة” كيجسد الأسلوب التكعيبي اللي تشهر به بيكاسو، التشويه المقصود وألوان رمادية كتعبّر على حالة نفسية ديالو، وحسب تصريحات حفيد الفنان، أوليفييه ويدماير بيكاسو، فالقيمة الحقيقية ديال اللوحة كتفوت بزاف الثمن ديالها لي كتقدر بكثر من مليون دولار، وهاد الشي كيخلي الجائزة استثنائية.