كود سبور//

رجعو الوداد الرياضي لتحقيق الرباح، وهذا الشي بعد شهرين من التعادلات والخسران، وغير علن ايت منة رئيس النادي والمكتب ديالو انهم ناويين يمشيو بحالهم واخا كايتماطلو، وهو هي تربح الحمرا، والفوز جا على النادي المكناس اليوم الاربعاء فستاد دونور ضمن الدورة 19 من البطولة الاحترافية.

الماتش بين الوداد الرياضي والنادي المكناسي سالا بنتيجة 2 لزيرو لمصلحة الفريق الأحمر، وماركا الهدفين للوداد حكيم زياش من كوفرا وبينالتي فالدقيقة 23 والدقيقة 45+6.

الرباح ديال الوداد الرياضي اليوم كايزيد يأكد ان ابتعاد هشام ايت منة على الفرقة واللعابا، كان عندو مفعول إيجابي وهذا الشي بعدما طالبوه الوداديين يقدم الاستقالة، وواخا قال هو هو والمكتب ديالو انهم ناويين يمشيو فبلاغ رسمي ولكن راه مازال لاصقين وكايتسناو الكورة ترجع تدور مع الفرقة باش يرجعو تاني للواجهة، غير هو بان انه بالفعل الابتعاد ديالهم على الحمرا فهاد اليومين اللي دازو كان مفيد، خصوصا ايت منة اللي كان كايدخل عند اللعابا حتى للفيستيير وكايتدخل فخدمة المدربين اللي كان كايجيب.

الوداد الرياضي خداو بهذا الرباح 3 نقاط مهمة، قلص بها الفارق مع الصدارة مؤقتا إلى 4 نقاط، وولات عند الفريق الأحمر 34 نقطة ومحتل المركز الرابع، أما النادي المكناسي بقاو فالمركز 7 وعندهم 27 نقطة.