وكالات //

فصدفة غريبة واستثنائية، سافر كوبل فرنساوي، فطيارة بوحدهم، حيت كانو هوما الوحيدين اللي استافدو من التيكي ديال ديك الرحلة اللي غاديا من أكَادير لمطار باريس أورلي، واللي احتاجت 8960 ليترو ديال الكيروزين باش تدير هاد التراجي.

وكتبات صحيفة “لوبارزيان”، بللي هاد الكوبل هما الوحيدين اللي استافدو من هاد الرحلة الأربعاء اللي فات، بعدما تلغات رحلتهم الأصلية مع شركة “Transavia” بسباب إضراب موظفيها.

رحلة الروتور تكلفات بيها “Air France”، ولكن بزاف ديال المسافرين، اللي كانو مقطعين مع “Transavia”،  بقاو فالمطار تالفين بدون حتى شي مساعدة او إرشادات عكس اللي وقع مع الكوبل المزهار.

الطيارة اللي مشاو فيها الكوبل هي من نوع “Airbus A319″، كتهز 140 راكب، لكن من زهر الكوبل لقاو راسهم بوحدهم فيها وليكيب كلها خدامة غير على قبلهم، فحال إيلا كارينها.

واستفاد الكوبل من خدمات “VIP” فالطيارة، وقال الزوج لـ”لوبارزيان” بللي حسو راسهم فحال كبار الشخصيات اللي كيكرو الطيارات بريفي باش يسافرو.