كود الرباط//

الكسيدة الخايبة لي وقعات حدا مقر وزارة الخارجية فالرباط، وللي مات فيها ولد عامل ورزازات، معليها حتى معطيات ولا بلاغ من النيابة العامة. واش تفتح فيها تحقيق ولالا؟ خصوصا وأنها قضية رأي عام وكولشي تابع الفيديوهات للي بلغت نسبة مشاهدات بالملايين.

لحدود الساعة مكاين حتى معطيات، حتى البنت لي كانت مع ولد العامل لي راكب بنتلي، معليها خبار، سوا أن بعض المصادر كتهضر على أنها فالإنعاش. شكون هاد ها البنت وشنو دخلها فهاد الكسيدة؟ واش هي ضحية ولا شنو؟.

كولشي كيسول كيفاش هادو خرجو من ريسطو مشهور فسلا، فوقت متأخر (علما أن هادي بالضبط خصها تحقيق ونعرفو كيفاش خرجو مور 3 صباح الوقت لي خاص البار يتسد).

قضية بحال هادي ماشي عادية، راه كانت كسيدة خايبة وفيها سرعة جنونية وحدا مقر وزارة اللي كتعتبر وزارة سيادية. تخيلو هاد بنتلي دخل فمقر الخارجية. كولشي ممكن بديك السرعة باش مشات.

دبا كاين لي كيهضر بلي التفوات هو سبب هاد الكسيدة؟ واش دار هادشي فمحضر البوليس؟ كولشي ممكن. ولكن يلا كان تحقيق تقدر تبان معطيات اخرى.

الملايرية فالرباط كيعرفو بعضياتهم. الهضرة كادور بيناتهم.. واش سبب الكسيدة لادروك ولا شنو؟ خاص تحقيق يوضح الحقيقة.

نرجعو للكسيدة، وقعات صباح السبت 8 يونيو 2024، مع ديك 5 صباح تقريبا أول أقل، واللي مات فيها ولد عامل مسؤول فالدولة. كترجع أسئلة كثيرة: كيفاش خرجو من ريسطو فيه باركينغ وهوما مفوتين.. ؟.

الخبار لي سبقات نشراتها “كود” هي أن ولد المسؤول مع صحابو خرجو كيتسابقو وغادين بسرعة كبيرة، مع العلم أن هاد ولد المسؤول كان راكب بنتلي (لي ثمنها تقريبا 200 مليون)، وكولشي كيعرف بنتلي يلا غادا بسرعة كبيرة شنو ممكن دير. ممكن طير بوطو (كيفما بان فالتصاور والفيديوهات يل عند “كود”).

الضحية للي توفى كان خارج من ريسطو مشهور مملوك لشخصية كبيرة فعالم المال والأعمال، مع ديك 4 صباح، مع العلم أن هاد الريسطو كيسد مع 3. يلا كان حال كثر من 3 صباح فراه فضيحة كبيرة.

هاد البار لي عندو مساحة الفوق بلا زجاج كينشطو فيها الناس، معروف شكون لي كيمشي ليها، وحتى لهنا مكاين مشكل، ولكن راه هادي بلاصة مشهورة وفيها باركينغ. مثلا ففرنسا ميمكنش تخرج من باركينغ شي ريسطو يلا كنتي مفوت بزاف، مغاديش يخليك السيكيرتي ديال الباركينغ.

هادشي كيعاود يرجعنا لموضوع: الأنظمة القانونية فبلادنا؟ كيفاش غايتم تنظيم هاد لي ريسطو بار باش نخففو من حوادث السير؟ وكيفاش خاص يتمنع أي واحد كان مفوت يصوك بفرض ذلك على اهاد الفضاءات يعني يصيطفوه ف ابليكاسيون أو طاكسي صغير.