كود ـ تطوان///
عرفات القنصلية الإسبانية بتطوان فالأيام الأخيرة موجة كبيرة ديال الشكايات من طرف بزاف ديال الناس اللي تقدمو بطلبات ديال تأشيرة شينغن.
وعبرو المشتكين، لـ”كود”، عن غضبهم من ما أسموه “انتقائية” و”عشوائية” فطريقة دراسة الملفات، وكذا فقرارات القبول والرفض.
وحسب إفادتهم، فالرفض طال حتى أطباء ومحامين وموظفين ورجال أعمال، رغم أنهم دايرين ملفاتهم كاملة ومستوفين جميع الشروط القانونية، وقدمو كل الوثائق المطلوبة.
فالمقابل، كيروج بأن التأشيرة تعطات لأشخاص ما عندهمش ضمانات مادية قوية ولا دخل قار، وهو ما لم يتسن لـ”كود” التحقق منه من مصدر رسمي في القنصلية.
وأمام هاد المشهد والهضرة لي كتروج بدات علامات الاستفهام كتكبر بخصوص المعايير اللي كتعتمد فالموافقة والرفض، وهو ما دفع عدد من للي ترفضات ليهم الطلبات ديالهم يطالبو بتعليلات واضحة بخصوص هاد القرارات، وبشرح المساطر المعتمدة باش تكون الشفافية وتكافؤ الفرص بين جميع المتقدمين.
وف ظل هاد الانتقادات، كيطالبو عدد من طالبي “الفيزا” القنصلية الإسبانية بتطوان باش تقدم تفاصيل على الطريقة المعتمدة فدراسة الملفات، خصوصا وأنها ما خرجات وعطات حتى شي توضيح رسمي حتى لدابا، وخلات الباب محلول أمام تناسل الشائعات.
