كود –  doctorsforpalestine //

فالويكند اللي فات، وصلت لقطاع غزة الدكتورة زينب المزبري، أخصائية فطب النساء والتوليد، وكتعتبر أول طبيبة مغربية كتدخل للقطاع من نهار بدات الحرب فأكتوبر 2023،الطبيبة  قدرات تخترق الحصار وسط ظروف خطيرة بزاف باش تعاون الطاقم الطبي الفلسطيني اللي كيعاني ضغط كبير.

الدكتورة مشات مع منظمة “أطباء من أجل فلسطين”، وهي منظمة مغربية كتحاول تقدم الدعم للأطباء والمرضى فغزة، المنظمة قالت باللي المزبري عضو فالتنسيق والتحقات بمجموعة صغيرة ديال الأطباء المغاربة اللي قدرو يوصلو لغزة وسط هاد الوضع الصعب.

من أكتوبر 2023 ، دخلو 13 طبيب مغربي تابعين للمنظمة، وزادو عليهم أطباء آخرين مغاربة عندهم جنسيات مزدوجة. من بين الأسماء كاين الدكتور يوسف أبو عبد الله، رئيس مصلحة جراحة الأطفال فمستشفى الحسن الثاني، والدكتور أحمد زروال، جرّاح الفم والوجه والفك، والدكتور زهير لهانا اللي زار غزة أكثر من مرة.

الدخول ديال هاد الأطباء كيتزامن مع وضع صحي صعب بزاف فغزة، أغلب السبيطارات  تدمّرت أو تضرّرات بشكل كبير، واللي بقا منها خدام غا بموارد قليلة  ما كتكفيش العدد الكبير ديال الجرحى والمرضى.

القرار ديال الدكتورة زينب المزبري كيخلينا نفكرو فواحد التناقض كبير، بلادها كتعاني من خصاص طبي فالجبال والمناطق النائية، وناسها محتاجين للرعاية الصحية، وفنفس الوقت اختارت تمشي لغزة وسط الحرب والحصار باش تعاون اللي كيعانيو فالأزمة الإنسانية الكبيرة، هاد القرار كيبين التضحية الشخصية ديالها ، ولكن كيثير تساؤلات على الأولويات والمسؤوليات تجاه بلادها لي كوناتها  والمجتمع اللي خرجات منو.