كود – وكالات //

علن الرئيس الأمريكي دونالد ترامب، الجمعة 18 شتنبر، على اتفاق  مع الدنمارك وغرينلاند، كيعطي لمريكان إمكانية دايمة ديال التدخل فالمجال الأمني فالجزيرة القطبية، اللي ولات وسط التنافس الدولي على القطب الشمالي.

ترامب قال فواحد المنشور على منصة “تروث سوشيال” بلي الاتفاق كيعطي لمريكان “سيطرة دايمة” على أمن غرينلاند، وزاد قال بلي واشنطن غادي تبقى عندها القدرة الكاملة باش تدير “كل ما هو ضروري” باش تحمي أمن غرينلاند و مريكان.

وزاد الرئيس الأمريكي أن أي دولة كتعتبرها واشنطن عدو ما غاديش يكون عندها الحق دير قاعدة عسكرية، ولا وجود عسكري، ولا استثمارات حساسة فغرينلاند، إلا بموافقة أمريكية مكتوبة وصريحة.

الاتفاق، حسب ترامب، جا باش يعالج المخاوف الأمنية الأمريكية المرتبطة بالموقع الاستراتيجي ديال غرينلاند، خصوصاً  من جهة روسيا والصين لي كينافسوها على منطقة القطب الشمالي.

ومن جهتها، أكدات الدنمارك أنها توصلات فعلاً لاتفاق مع الولايات المتحدة، وقالت رئيسة الوزراء ميتي فريدريكسن بلي الاتفاق كيقوي الأمن المشترك فالقطب الشمالي وشمال المحيط الأطلسي، وكيحترم فالنفس الوقت سيادة المملكة وسلامة أراضيها وحق سكان غرينلاند فتقرير المصير.

حتى رئيس وزراء غرينلاند ينس فريدريك نيلسن أكد الاتفاق، وقال بلي كياخذ بعين الاعتبار مصالح غرينلاند وبلاصتها فالتعاون الدولي.

وكتحاول واشنطن  توسع حضورها الأمني فالمنطقة، خصوصاً بسبب الموقع الجغرافي ديال غرينلاند بين أمريكا الشمالية وأوروبا، والثروات الطبيعية والطرقان البحرية المهمة فالقطب الشمالي.