كود احمد الطيب الرباط ///

البارح الاثنين 4 دجنبر 2023 كانت زيارة مهمة بزاف لرئيس الدولة الملك محمد السادس لدولة الامارات العربية المتحدة. زيارة رسمية عندها اهمية كبيرة. حدث مهم.

غير من تركيبة الوفد ثم عدد مذكرات تفاهم والبيان الختامي كيبين طبيعة هاد الزيارة التاريخية. الوفد المغربي فيه 8 الوزراء فحكومة اخنوش. فيه 10 مدراء لمؤسسات كبيرة فالبلاد. بلا ما نهدرو على جوج اولاد عمة سيدنا ومستشارو والحاجب الملكي وعدد من المسؤولين.

من الجانب الاماراتي كان 16 فيهم امراء عندهم مهام حيوية فالدولة وزراء فقطاعات حيوية وكبار مستشاري محمد بن زايد.

تم التوقيع على 12 مذكرة تفاهم فيها استثمارات كبيرة فقطاعات مختلفة من الموانئ حتى المطارات والقطارات وبناء مناطق دمرها زلزال الحوز وتحلية مياه البحر ….

ثم هاد الزيارة جات بعد فترة على اخر زيارة رسمية دارها سيدنا لشي دولة. يعني فالصحافة هادا حدث مهم بزاف. خاصو خدمة بزاف. دابا هادي حتى الاعلان عليها بان فالخاريج بعد نشر صور لطائرة مشات من المغرب لابو ظبي ظهر الاحد اللي فات. دازو ساعات عاد خرج خبار باللي سيدنا غيبدا زيارة رسمية الاثنين 4 دجنبر 2023

يعني المعلومة ما كانش. هادي زيارة خاص الاعلان عليها قبل وخاص فتح الاعتماد سواء فالامارات او بتنسيق مع المسؤولين على الاعلام فالقصر الملكي. اللي مشى هو الاعلام العمومي: لاماب اللي دارت اخطاء وحاولات تداركها ولكن مديرها ما داوهش معاهم. مشات “دوزيم” و”الاولى”…

علاش همشو الاعلام الخاص. كيفاش دولة مخلصة عام صالير الصحافيين فصحف ورقة والكترونية ونفس الدولة مهمشة صحافيين وصحافيات يمشيو لنشاط على قدر كبير من الاهمية.

الصحافة وجودها مرتابط بالمعلومة بالاساس. كيفاش تبين الدولة دعمها للاعلام وفنفس الوقت تهمشو.

علاش المكلفين بالصحافة فالقصر الملكي يعلنو قبل على الزيارة. ديك الساعة يشوفو الصحافيين الاعتماد من دولة الامارات شرط خاص التواصل من الجانب المغربي. وديك الساعة المؤسسة الاعلامية اللي قدرات تمشي للامارات على حسابها. تاخد لوطيل والطيارة وتخلص النقل تماك٬ مرحبا بيها.

هاد الشي كيفرض٬ كيف قلت٬ تواصل لهيه لمسؤولين مغاربة مع الصحافة.

دابا كاينين شي مسؤولين فالقصر عندهم دور فتهميش الاعلام الخاص. ما باغيينش يخدمو ما باغينش الاعلام الالكتروني والورقي يدير خدمتو. هاد الشي خاصو يتبدل. يتعقلن اكثر. ما كاينش الفابور وتكون غير المعلومة