كود الرباط//

القيادي فالبام احمد التويزي دار بلاغ غريب وغبي في نفس الوقت، كيفاش نائب برلماني ورئيس فريق ثاني أكبر حزب فالأغلبية كيجي يبرر كلام فيه تهمة كبيرة كتعلق ببيع دقيق مخلط بالوراق..  بعبارة “كنت كنقصد المجاز”؟ .

هاد البامي نسا بلي كيهضر ف إطار مناقشة مشروع قانون المالية 2026 وف لجنة المالية، للي اللغة لي تتكون فيها هي الارقام والمعطيات الدقيقة، ماشي الكلام ديال الاسواق والمقاهي.

اللي عندو معطيات يقدمها، واللي ما عندوش يسكت فمناقشة الميزانية، حيت الكلام فهاد النوع من الملفات كيأثر على سمعة قطاع وطني كيخدم آلاف المغاربة وكيعيش منو الملايين. وزيد عليها راه كيهضر ف موضوع كيتابعوه متخصصين ف المالية ومن الضرائب. يعني تشكيك ف مصداقية مؤسسات الدولة ف مراقبة اهم مكون غدائي عند المغاربة وهو الخبز.

التويزي خربقها، وحاول يدور الكلام ديالو بدبلوماسية سياسية خاوية. والأغرب، أن الحزب ديالو هو اللي كان مبلوكي المهمة الاستطلاعية حول الدقيق المدعم منذ 2018، واليوم كيدير فيها “حامي المال العام”. وردها فواتير وتلاعبات ف ملفات الدعم. حتى هادي التهمة كتبقا غير كلام ومكاينش دليل. مشات ايام فاش كيكونو نواب برلمانيين كيحرجو الحكومة بملفات ووثائق.

هذا غباء سياسي وضحك على الذقون، ومحاولة فاشلة للركوب على ملف حساس بلا معطيات ولا أرقام. الدعم ديال المقاصة خصو نقاش حقيقي. والفكرة ديال رفع الدعم من الناحية الفوائد الاقتصادية والاجتماعية مزيانة، ولكن المدافع عليها محامي فاشل بحال التويزي.

وفهاد التوضيح للرأي العام، قال أحمد التويزي، رئيس فريق الأصالة والمعاصرة بمجلس النواب، أن عبارة “طحن الورق” اللي وردت فمداخلتو ما كانتش مقصودة بمعناها الحرفي، وإنما تعبير مجازي يقصد به “التلاعب في الوثائق أو الفواتير المتعلقة بالدعم العمومي”، نافياً أي علاقة بين كلامه وبين مزج مواد غير صالحة بالدقيق أو المساس بجودة المنتوج.

وأضاف التويزي أن حديثه أُخرج من سياقه وتم استغلاله لأغراض الإثارة و”البوز”، مؤكداً أن الهدف من مداخلته كان التنبيه إلى ضرورة مراقبة جودة الدقيق المدعم وآليات صرف الدعم العمومي، مشدداً على أنه سيواصل الدفاع عن إصلاح منظومة الدعم وتوجيهه مباشرة إلى الأسر الفقيرة في إطار عدالة اجتماعية تحفظ كرامة المواطن وتوازن المالية العمومية

يشار بلي اليوم الاول ف المناقشة العامة لمشروع قانون المالية 2026 (آخر سنة ف عمر الحكومة)، فجر فريق البام بمجلس النواب، فضيحة على وزارة المالية، فاش قال رئيس الفريق احمد التويزي (للي خدا البراءة من ملف ديال الفساد ثقيل) بلي الدعم ديال الدقيق فيه التخلويض وبلي كاينين شركات كتصنع الدقيق من الكرطون وتعطيه للمغاربة.