وكالات//

كيقولو باللي النجمة الأمريكية بيونسيه وراجلها المغني جاي-زي وصلو للمراحل الأخيرة باش يشريو واحد الأرض مساحتها 58 فدان بضواحي قرية سميتها ويجينتون، فـ منطقة كوتسوولدز فـ إنجلترا، بعدما خداو الترخيص باش يبنيو فيها “فيلا ريفية فخمة”.

القصر اللي ناويين يبنيوه غيكون فيه 7 ديال البيوت و9 حمامات، وكيطل على بحيرة، وهادشي كيبين باللي كيقلبو على الخصوصية والرفاهية وسط الطبيعة.

حسب صحيفة “ديلي ميل”، إلى تكمّلات هاد الصفقة، غادي يسكنو بيونسيه وجاي-زي قريب من بلاصة سميتها “جريت تو” اللي ساكنين فيها بزاف ديال المشاهير، بحال عائلة بيكهام والمقدمة ديال البرامج إيلين ديجينيريس. منطقة كوتسوولدز معروفة بلقب “هامبتونز ديال بريطانيا”، وولات بلاصة مفضلة عند الأغنياء اللي كيقلبو على الراحة والخصوصية.

ولكن، وصولهم للمنطقة دار شوية ديال الجدل بين السكان. كاين اللي فرح وقال أنه متحمّس يشوف بيونسيه فشي نشاط محلي، وكاين اللي خايف باللي وجود مشاهير غادي يبدّل طابع القرية ويجبد بزاف ديال الأنظار غير المرغوب فيها.

ناس من المنطقة قالو حتى باللي دخول الأغنياء من برا غادي يخلي أسعار العقار تطلع، وهادي حاجة غادي تصعّب على السكان المحليين يشريو بيوت فالمنطقة.

الأرض اللي شراوها كتوصل لحوالي 7.5 مليون جنيه إسترليني، ولكن من بعد ما يتبنى القصر، القيمة ديالو تقدر توصل حتى لـ18 مليون جنيه.