الرئيسية > آراء > غانشوفو أكفس ولاية على مستوى الجهات.. “البام” عطى لزبانيتو جهات غاتعاني مع التسيير الكارثي 
18/09/2021 11:00 آراء

غانشوفو أكفس ولاية على مستوى الجهات.. “البام” عطى لزبانيتو جهات غاتعاني مع التسيير الكارثي 

غانشوفو أكفس ولاية على مستوى الجهات.. “البام” عطى لزبانيتو جهات غاتعاني مع التسيير الكارثي 

كود كازا //

حزب الأصالة والمعاصرة اللي معروف أنه محطم الأرقام القياسية فقضايا الفساد والارتشاء واعتقالات سياسييه، دار واحد الخريطة سيئة جدا لرئاسة الجهات.

طبعا الباميين دارو يديهم ورجليهم باش يردو عبد النبي بعيوي لرئاسة جهة الشرق، وأكيد كاين شي صفقة كبيرة خلات هاد السيد يرجع لهاد المنصب بسهولة، خصوصا أنه محكوم بالحبس وتا جهة ماقادرة تنفذ عليه الحكم حقاش مبلوكي فمحكمة النقض، وطبعا الملف ماشي فيد عبد النباوي براسو اللي تاهو باغي يفك عليه هاد الملف ولكنو ممنوع يقيس فيه.

طبعا جهة الشرق غاتعاني مرة اخرى من رئاسة عبد النبي بعيوي لـ6 سنوات أخرى، وكيف كانت الكثير من المشاريع تحوم حولها الشبهات، غايتكرر نفس الأمر فهاد الولاية.

مراكش نتاقلات من اخشيشن اللي هو واحد السيد خاصو يدوز يتحاسب على بزاف ديال الحوايج، (نتاقلات) لسمير كودار، هاد السيد اللي سياسيا ضعيف وماعندوش كاريزما يقدر يسير بيها جهة مراكش، واللي تعطاتو هاد الجهة بدعم من الأحرار والاستقلال، هو واخشيشن اللي كانو كيسيرو الجهة فالولاية السابقة حقاش كان نائب ديالو، دوزو ولاية سيئة، ولكن هادي غاتكون ولاية أسوء.

أما جهة الرباط، فعطاوها لسياسي سيء ديال بصح، اللي هو رشيد العبدي، السيد ماعارف تا القوانين السياسية وكان نشر نهار التصويت إشهار لحزبو على صفحته الفايسبوكية قبل ما ينبهوه أن هادشي ممنوع ومسحو.

العبدي اللي ماكيعرفش يتواصل وكيخاف يجاوب على الصحافة حقاش ماكيعرفش يعطي التصريحات، غايدوز وحدة من أسوء ولايات جهة الرباط، لأن السيد ضعيف سياسيا وحتى فالتسيير ضعيف بزاف لدرجة أنه عمرو سير حتى دوار ماشي جماعة، فكيفاش قدر يوصل لرئاسة الجهة رغم ضعفه سياسيا وتسييريا، هادشي كيبين الفضيحة اللي راحنا ماشيين ليها.

أما جهة بني ملال-خنيفرة، غادي تعطى للبامي عادل بركات، اللي كان واحد من أشد البرلمانيين المدافعين على تقسيمة وزيعة تقاعد البرلمانيين على البرلمانيين، واللي تمت إقالته من طرف عبد اللطيف وهبي قبل شهور بسبب فضائحه في تسيير الحزب ببني ملال.

وكانت واحدالنقطة ديال الضوء فهاد الجهات غاتمشي لعبد الوهاب بلفقيه فكَلميم، ولكن حقاش الباميين باغيينها ظلام وماكيبغيوش نقط الضوء، خانو بلفقيه وتقلبوا عليه كيف موالفين يديرو ديما بالدسائس والفضايح.

موضوعات أخرى