كود الجديدة ////

البارح الجمعة 16 ماي 2025 بمركز المعارض محمد السادس بالجديدة كان احتفال كبير للاذارة العامة للامن الوطني فالذكرى 69. القاعة كانت عامرة. الحضور الدولي كان كبير. مسؤولين كبار فالصبليون وفرانسا ورئيس الانتربول والامين العام لوزراء الداخلية العرب التابع لجامعة الدول العربية ورئيس جامعة نايف العربية للعلوم الأمنية

فالحفل حضرو مدراء النشر لعدد من الصحف والمواقع الاخبارية وعدد من الصحافيين وحتى الفياسبكة واليوتوبرات حضرو. شي وحدين عندهم سوابق ويالله تحكم عليهم غير هاد السيمانا. كان حتى الياس المالكي مع المغنية سكينة فحصي وعصام كمال ديال “مازاگان”. هاد الثلاثة حضورهم عندو مبرر. ب3 اولاد الجديدة. الحفل اصلا عندهم فمدينتهم.

الصحافة البارح كانت طبقات. شي مريح فالصف الاول وشي فالثاني وشي فالثالث وشي فالرابع ….. كمال لحلو مول اذاعة “ام اف ام” و”تشالنج” و”ڤيرسيون اوم”، بغى يگلس فالصف الاول كيف كيدير ديما، الساعة لقى بلاصتو الصف الثالث. ما رضاش وما قدرش يحتج. كاين شي صحافيين لقاو ريوسهم قراب من شي وحدين هادي سنوات وهما كيسبو فيهم ويعايروهم. فالداخل كلشي انضابط.

ماشي كيف دورة اكادير، المدير العام للمديرية العامة للامن الوطني عبد اللطيف الحموشي ما تلاقاش بالمدعويين كلهم. الضيوف لكثار من برا خلاه ما يشوف الا شي اعلاميين مشاو عندو او تلاقاوه باش بغى يخرج. العام اللي فات دار سلم على كلشي.

جديد هاد العام هو حضور عدد كبير من رجال الاعمال لمغاربة. الحضور جا لانو اول مرة كيكونو سبونسور فالايام المفتوحة للامن. كان شي 45 شركة مغربية دعمات هاد الحدث. الادارة العامة شكراتهم كلهم فالكلمة اللي لقاها باسم المديرية العميد الإقليمي المكلف بالتواصل، رضا اشبوح. للاشارة هاد العميد المعروف عند الصحافيين، تعرفو عليه الضيوف كلهم. قافز.

شفنا من رجال الاعمال غيثة زنيبر والمنتصر بالله ديال “انوي” اللي ما تفارقش مع محمد بنشعبون ديال اتصالات المغرب”. كان بنصالح محمد وسعيدة كريم العمراني وشي حد كيقدم راسو مهم بزاف كيمثل “المدى” وابراهيم مجاهد…. حضرو كاع اللي دعمو الايام المفتوحة. دخلوهم كلهم فالقاعة ديال الضيوف ودارو فالاروقة ديال الابواب المفتوحة ودخلو مع لفتيت وحموشي.

من الحكومة حضر وزراء الداخلية والاوقاف والمالية =الوزير المنتدب للمالية= والرئيس المنتدب للسلطة القضائية ورئيس النيابة العامة الجديد وعدد من مسؤولي مؤسسات تابعة للدولة بالاضافة الى قائد الجدارمية والمفتش العام للقوات المسلحة الملكية قائد للمنطقة الجنوبية وحضر كريم بوزيدة المكلف بمهمة فالديوان الملكي

كلشي حضرو لحفل بدا بعد الثمنية وما سالى حتى قربات لحداش دالليل, عدد من المدعويين تلاقاو فمحطة الاستراحة دلوطوروت بين الجديدة وكازا، تعشاو تماك قبل ما يكملو طريقهم بعد متابعة حفل زوين. هادوك “الڤي اي پي” ديال رجال الاعمال والمدعويين عرضو عليهم لعشا ف”مازاگان”، الباقي هرس الجوع بالبوفي اللي كان فيه الزحام ولا مشى لبرا ياكل. المهم للي حضر شبع فنيا الكوريغرافيا زينة والموسيقى مقادة. فنيا النيڤو طالع