كود – عثمان الشرقي//

من تيزي نيسلي البارح الأربعا 16 شتنبر، خرجات الحملة الانتخابية ديال حزب التقدم والاشتراكية بإقليم بني ملال، بقيادة مريم حساة، وكيلة لائحة الحزب، قبل ما تكمل طريقها لزاوية الشيخ، ومن بعد لمنطقة أم البخت والحزام الجبلي ديال دير القصيبة، حتى لإغرم إعلام.

گود رافقات الحملة من السوق الأسبوعي بالمنطقة ولي كان مناسبة لرفاق مريم حساة وأنصار الحزب باش يتواصلو مباشرة مع المواطنين والناخبين، ويشرحو ليهم الرسالة الانتخابية ديال الحزب ويحاولو يقنعوهم بالتصويت على مريم حساة ولائحة التقدم والاشتراكية.

https://www.facebook.com/share/v/1CR8mJNFcG/

جريدة «كود» سجلت أن هاد الحملة دازت بلا هيلالة، بلا بواق ، و بلا رمي الاوراق فالشارع وعوض هادشي كان التركيز أساساً على التواصل المباشر مع الناس، والاستماع ليهم ومحاولة إقناعهم.

ومن السوق الأسبوعي، انتقلو رفاق مريم حساة لمدينة زاوية الشيخ، فين دارو جولات وسط الاحياء وتواصلو مع المواطنين، ومن بعد، واصلات الحملة المسار ديالها لمنطقة أم البخت، قبل ما تدخل للحزام الجبلي ديال دير القصيبة، فين دار الوفد عدة لقاءات مع الساكنة.

فهاد اللقاءات، عبرو المواطنين على مجموعة من المشاكل والانتظارات ديالهم، المرتبطة بالطرقان والخدمات الأساسية والعزلة، زيد عليها المشاكل اللي كتهم النشاط الفلاحي والحياة اليومية فالمناطق الجبلية والقروية.

وفهاد الجولة، كان التواصل بالأمازيغية حاضر بشكل كبير، من طرف رفاق مريم حساة وأنصارها لي تواصلو مع المواطنين بلغتهم اليومية، وحاولو يوصلو ليهم الخطاب الانتخابي بشكل قريب ومباشر.

فمدينة إغرم علام، التحقت مريم حساة بالرفاق ديالها، قبل ما تزعم مسيرة رفاقها وسط حضور كبير من المشاركين والساكنة ،اللافت فهاد المسيرة، حسب ما عايناتو «كود»، هو الطريقة العفوية اللي كانت بها مريم حساة كتزعم الحملة،حيث كانتش كتطلب من المواطنين يصوتو عليها ، وما كانتش كتقلب على الفرص باش توزع القبلات على العيالات والعائلات باش تستامل الناخبين.

التواصل كان عند وكيلة لائحة الكتاب عفيف وبلا تكلف، فديكور كيبان فيها التفاعل المباشر أكثر من الاستعراض الانتخابي.

وفحوارهم مع «كود»، أكد عدد من أنصار مريم حساة أنهم هما اللي طلبو منها تترشح من جديد، بعدما شافو فيها، حسب شهادتهم، الصدق فالولاية البرلمانية السابقة ،وقالو إنهم كيربطو هاد الدعم بالإنجازات والمشاريع لي جابت لهم كبرلمانية وكرئيسة جماعة تيزي نيسلي.

https://www.facebook.com/share/v/19UQdsZejj/

ومن بين الملفات اللي ذكروها، إصلاح عدد من الطرقان، وتقريب الماء الصالح للشرب، وإنجاز أو تقريب قنوات الواد الحار، إضافة لهتمام بالحاجيات المرتبطة بالفلاحة، وحسب تصريحاتهم، فمريم حساة قربات للساكنة عدد من المستلزمات اللي كيحتاجها الفلاح، من العلف والزرع وغيرها، الشي اللي كيعتابروه سبب فتمسكهم بترشيحها من جديد.

كما أكد عدد من المشاركين لـ«كود» أنهم شاركو فالحملة بشكل تطوعي، وبلا أي مقابل مادي، وقالو إنهم ما خذاو حتى درهم مقابل مشاركتهم. وهاد الطابع التطوعي بان حسب ما عايناتو «كود» فوجبة الغداء، مني خلصو من جيوبهم.

ومن بعد ما سالات الجولة، عبرات مريم وحساة فحوار لها مع گود على فرحتها بالأنصار والرفاق اللي واكبوها، ووجهات ليهم الشكر على الثقة اللي وضعوها فيها.

مريم حساة قالت لكود أن الترافع كيبغي السوفل فقبة البرلمان وأنها كتعرف مزيان مختلف مناطق الإقليم ومشاكلو، وإنها كتدير المجهود ديالها باش تتابع الملفات المطلبية اللي كيوصلوها من المواطنين، كيفما كانت طبيعتها.

https://www.facebook.com/share/v/1B55NEMMQ4/

وشددت، حسب تصريحاتها، على أنها كتخدم بالنزاهة والشفافية، وما كتعاملش مع الحملة بمنطق تبذير الأموال أو الحيحة، وقالت بلي ما كتشريش للأصوات ، وبالنسبة ليها، تابرلمانيت مسؤولية، وعبّرات فالأخير أنها مكيهمهاش المنصب بقدر ما كيهمها تخدم ساكنة الإقليم.