كود – ميدلت//
عرف إقليم ميدلت، اليوم الاحد 21 دجنبر، خروج عيالات وولادهم من دوار تعرعارت فمسيرة احتجاجية سلمية، باش يحتجو على المحاين اللي كيعيشوها سكان دوار تعرعارت لي كيقولو أنهم بغاو حقهم من المساعدات اللي كتفرقها مؤسسة محمد الخامس للتضامن للمناطق المتضررة من موجة البرد الأخيرة.
والعيالات كيحتجو كذلك على قبل الطريق لي مقطوعة واللي كتربط بين دوار ماسو ودوار تعرعارت الشي اللي زاد فمعاناتهم اليومية. مصادر كتقول إن الساكنة كتعيش مشاكيل كثيرة الشي لي خلا الوضعية تزاد تصعاب، نفس المصادر كتشير أن آليات تحياد الثلج عليها الضغط وبعضها واحل فدوار ايت مرزوك فنفس الإقليم.
فهاد السياق، قائد قيادة اكوديم كيدير حوار مباشر مع الساكنة فمدخل دوار ماسو، بعد ما نظمو المسيرة، باش يسمع لهم ويقنعهم باللي غاتوصلهم المعونة مني تفتح الطريق.
