كود سبور//

اعتبر عبد العالي عوينة المدرب المساعد لفريق شباب السوالم، أن الرباح اللي حقق الفريق الديالو على الرجاء فتيران برشيد برسم الدورة 6 من البطولة الاحترافية، كان مستحقق وأكد انهم كانو مخططين لهذا السيناريو.

وجاوب عبد العالي عوينة على سؤال “گود” خلال الندوة الصحافية بعد ماتش الراجا الرياضي وشباب السوالم، وقال: “حنا كنا داخلين معولين على هذا السيناريو (الرباح)، دخلنا اما باش نتعادلو او نربحو وما كناش دايرين فبالنا الخسران”.

وبخصوص الأشياء اللي دارت الفرق فالماتش جاوب عوينة على سؤال “گود”، وقال أن الجانب الذهني لعب دور حيث خدم مع اللاعبين ذهنيا قبل الماتش ووجدهم، وقال أيضا أن الجانب البدني كان عندو دور مهم.

وهضر عوينة على الفرق بين الرجاء الرياضي والسوالم من ناحية اللاعبين اللي فكل فريق، وقال أن كاين الفرق بين الفريقين وحتى المدرب ديال الرجاء الرياضي اللي اجنبي وعندو تجربة، ولكن هما درسوه ودرسو الرجا مزيان وركزو على نقاط قوة الرجا كثر باش يضعفوهم قبل ما يركزو على نقاط ضعف الفريق الاخضر، وقال ايضا أن مدرب السوالم ما خدمش معهم هذا الماتش حيث توفى له باه.