سهام البارودي كود ////

كاين واحد المثل إفرنجي مشهور كايقول
Les hommes font les lois et les femmes font les moeurs.
يعني الرجال كايصنعو القوانين و العيالات كايصنعو “الأخلاق” او “العادات”، هاد المثل ماجاش و تحط غا هكاك ! الأصل ديالو هوا واحد التقسيم عاش عليه الإنسان منذ الازل خصوصا فالمجتمعات الذكورية، التقسيم لي كايعطي للراجل العقل و المرا الأحاسيس ! و بما أن الرجل كايتربط بالعقل فگاع داكشي لي كايبغي العقل كايتربط بيه مثلا الراجل هوا لي كايبني الحضارات و الدول و كايدير القوانين باش غايعيش المجتمع و العيالات حيت معطي ليهم داكشي ديال الأحاسيس و الكبيدة هشيشة أي حاجة متعلقة بالقلب كايربطوها بيهم ( العيالات مسؤولات على تربية الدراري و الأخلاق الحسنة ديالهم …) و هادشي كان ماشي ماكانش حيت بصح الرجال لي حفرو القناطر و الطرق و صنعو و

البواخر و الطيارات باش الانسان قدر يطور الحضارة ديالو، و العيالات كانو فالديور كايحركو الگوامل ديال الماكلة و كايدوقو واش ناقصين ملحة ! و لكن هذا ماشي موضوعنا. علاش جبدت هاد التقسيم حيت باش تفهم أي ظاهرة و تفهمها مزيان خاصك ضروري تحطها فالسياق التاريخي و الإنساني ديالها.

مؤخرا سقراط (ماشي داك سقراط ديال الفلسفة) سقراط الرحماني، دار لايف فالفايسبوك مع غيتة مراتو، أنا شخصيا و حيت سقراط و غيتة صحابي فالفايسبوك تفرجت شوية فاللايف و هضرت معاهم و زدت خلفة مع الطريق خليتهم ناشطن لاعبن ضاحكن مع بنادم فالفايسبوك.

من بعد ناض الصداع على اللايف و تبارطاجا فجميع الصفحات القادوسية و طبعا فينما كان شي قادوسي و لا شي قادوسية ناضو كايغوتو “اللهم إن هذا لمنكر” كيفاش واحد جالس هوا و مراتو لابسين حوايج لي كايلبسو فالدار و كايضربو الطاسة و كايضحكو فالفايسبوك ؟! اللهم إن هذا لمنكر كيفاش كاين كوبل فالمغرب ماكايشبهش للكوبلات التقليديين! القادوسي اصطلاحا هوا أي واحد لا يقبل الاختلاف يقدر يكون” حداثي” قادوسي ! طيلمو مكوانسي من زكو كو مايقدرش يتقبل شي حاجة غريبة عليه! صعيب طبعا بنادم ديالنا يفهم هادشي لي دار سقيريط و مراتو ! مازال خاصنا بزااااف ! نعيشو و نموتو و نعيشو و نموتو شي سبعين مرا و شوف تشوف.

الطامة الكبرى كانت بالنسبة ليا هي رد الفعل ديال العيالات على اللايف ديال سقراط و غيتة! بحكم أني مخشية فشي گروبات نسائية، لقيت الروينة نايضة عند العيالات و كلهم كايسبو و كايعايرو فسقراط و مرتو ! و سقراط ديوثي و غيتة ماعندهاش علاش تحشم و أين ذهبت الأخلاق؟ و واش هادو هوما لي كايعطيو القدوة لوليداتنا ؟ أين ذهبت الشهامة؟

أنا عندي مشكل خاص مع العيالات من هاد النوع ! مع البخيخيشات لي مديور ليهم غسيل الدماغ ! فاش كانشوف هاد المناظر كانكعا ! حيت العيالات هوما لي بقا عندنا فيهم شوية ديال الأمل يبدلو هاد المنظومة ديال العادات و التقاليد البالية لي خمج فيها المجتمع ! حيت العيالات هوما المتضررات ديال بصح من هاد الثقافة ديال حشمي ! سكتي ! تغطاي ! ضبري على راجل تستري ! هوما أول المتضررات من القمع و انعدام الحريات ! و حيت دينمكم نتوما العيالات لي غدا غاتربيو جيل ديال الأطفال كايآمنو بالإختلاف و الاحترام و الحريات و هادشي علاش بقينا مع طاسيلت مكم كانحاربو ليكم الأمية
فاش جات ميشيل اوباما للمغرب ! جات عوالة على مشروع واحد ! البنات يقراو ! تحت شعار let girls learn
الناس لي فاهمين و عارفين كايدفعو بالعيالات و البنات يقراو علاش ؟ ماشي باش تتهجاي التيكيتة ديال دردك و أبيتين آ بنت القحبة و لا باش تعلمي طابي “وصفة لتبييض المناطق الحساسة” فگووگل و تنقلي الوصفة ديال كيكة بدانون فاني من عند شوميشة فشي دفتر طناشر ورقة لا ! الناس كايدفعو العيالات يقراو باش يتحلو ليكم عينيكم و توعاو شوية ! باش تعرفو بلي راكم كايتمارس عليكم واحد غسيل الدماغ من شحال هادي و واحد الضغط باش ماتفهموش شنو واقع و باش تبقاو دينمكم ديما تحت السباط تاكلو و تشربو و تحلو رجليكم بالليل ! الناس لي كايفهمو كايقلبو يقريو العيالات حيت عارفينهم هوما لي يقدو يقربلو هاد المنظومات البالية و يردمو هاد العادات و التقاليد الخامجة لي كاتولد لينا جيل مشوه !ماعندو لا ساس و لا راس.

المرا سلاح خطير قادر يدير التغيير و غدا يعطينا جيل زوين ! جيل نقي ! جيل كايآمن بالإختلاف و كايحتارم الصغير و الكبير عزي و بيض مسلم و ملحد قحبة و طبيبة …. ! هادشي عايقين بيه الخوانجية ! داكشي علاش كايسدو عليكم فالديور و وسط للدرابل و الدرور و الحوايج و كايعلموكم بلي ” أجمل ما في المرأة حياؤها” زعما ضربي الطم و سكتي، و ماتحاوليش تبدلي شي حاجة فهاد المنظومة لي حاطاك تحت السباط ! و كاتعتابرك مخلوق غير كامل خاصو باه و خوه و راجلو يضورو بيه و يگيدوه ! و لا ماكانوش راه يضرب باباه الخلا! عايقين بيكم سلاح مقود يقدر يقربل على باباهم داكشي لي كايبنيو فيه هادي سنين داكشي علاش كايغسلو ليكم دماغكم.

ردة الفعل ديال العيالات على الفيديو ديال سقراط و غيتة كاتبين بلي بصح العيالات عندنا بزاف فيهم تدريساو كي الكلاب حتى مابقاوش قادرين يخرجو من القوقعة لي طراساوها ليهم باش يفكرو فيها و يخدمو دماغهم واحد الشوية و يعرفو راسهم بلي راه من مصلاحتهم هاد المنظومة التقليدية الخامجة تهرس باباها ! و بكثرة ماتدريساو مزيان ولاو هوما براسهم حماة المنظومة ! ! ولينا كانشوفو عيالات ببزازلهم قد الشكوة د اللبن كايقولو “الراجل لي مايضربش مرتو ماشي راجل” و “ولدي نخليه يخرج للزنقة و يتعطل و البنت لا”… و”الراجل مايعيبو إلا جيبو” … و شي افكار خرائية كايداولوهم العيالات بيناتهم و كليرضعوهم لبناتهم فالبزولة.

وا نتوما قريتو و جات ميشيل اوباما بغات تعتقكم من الكالاخ و دارو لطاسيلت مكم المدارس و فايسبوك و التلفزة و تركيا بلا فيزا غا باش تحلو عينيكم و تسافرو و تقراو و تشوفو و لكن هيهات هيهات نتوما مازال مكسل ليكم حمار فراسكم.

عولنا عليكم بكري تولدو لينا الجيل لي كايحتارم الآخر، الجيل لي كايآمن بالحريات و بالإنسان.
بزاف عليكم الإنسان .