كود -وكالات//

فواحد تحدي لمعايير الجمال التقليدية، بدات كتنتاشر فالصين وسط عدد من الشابات موجة جديدة، اختارو فيها الشابات مايبقاوش يحشمو من شعر الطوابگ .

عوض الحسانة، بعض هاد الشابات ولى شعر الجسم عندهم وسيلة للتعبير على راسهم، حيث كيلونوه بألوان فاتحة بحال الوردي، والأزرق، والأصفر، وكيعرضوه فمواقع التواصل الاجتماعي.

هاد الظاهرة بدات كتبان كثر فالتصاور والفيديوهات اللي كتنشرها شابات صينيات، كيبانو فيها بشعر الجسم ملون، بلا ما يحاولو يخبيوه ولا يتفاداوه.

كتعاود وحدة من المشاركات فهاد الموجة على السنوات اللي دوزاتها وهي كتواجه الانتقادات والتنمر بسبب شعر الجسم ديالها، حتى كلمات بحال «지저분하다»، اللي كتدل على الوسخ وعدم النظافة، كانت كتقال ليها.

ولكن من بعد ما اختارت تلون شعر الجسم ديالها بالوردي، كتقول إنها ولات كتحس براسها أكثر ثقة. وكتشوف أن هاد الخطوة كانت بالنسبة ليها طريقة باش تخرج من الضغط اللي كيتفرض على العيالات.

وهاد الجرأة ماجاتش من فراغ، حيث كتربط بعض هاد التجارب بالتأثر بنجمات عالميات بحال ليدي غاغا، اللي سبق ليها خرجات فإطلالات كتتحدى التصورات التقليدية ديال الشكل والجمال.

الحاصول، تلوين شعر الجسم ماشي غير مسألة ديال لون وردي ولا زرق، بالنسبة لهاد الشابات، راه محاولة باش يقولو بلي معايير الجمال ماخاصهاش تكون مفروضة على الجميع، حتى الجسد يقدر يكون مساحة للاختيار والتعبير.