كود هناء ابو علي ///

لوموند دارت افتتاحية كلها قصف للمغرب. دروس استعلائية من قوى استعمارية. وصلات بيهم الوقاحة حتى يقولو باللي خاص اوربا يدخل يضغط على المغرب باش يقول ليه ما خاصكش توظف شعبك. اييه ما فراسناش باللي الرباط مستعمرة اوربية.

فواحد الافتتاحية احتافلات بيها نخبة كازاوية فيهم ملايرية ما كيخلصوش حتى الضرائب وباركين كيتشفاو فبلادهم وكيفرقو فالمقال بحال شي قرآن منزل٬ قالت الجريدة الفرنسية بيقينية باللي المغرب كان سلبي ما دار والو بل سمح لهادوك 8 الاف يدخلو ولا وراهم منين يدوزو.

كما اعتبر هاد “الاعتداء” وهاد “الشونطاج” =نقلو تعبير وزيرة الدفاع الاسباني= كولو اخراج مغربي. واضافت ان الدولة المغربية وظفات شباب مقودة عليه اجتماعيا وبهاد الشي المغرب ولى كيشبه اردوگان تركيا او معمر القذافي ليبيا

الجريدة المحترمة جدا كتبات باستعلاء. كتعطي الدروس لبلاد مستقلة. كتقول لاوربا باللي جا الوقت باش تخرجو من نوع من السذاجة فنظرتكم للمغرب. الاقتراح ديال هاد العنصريين اللي كيأمنو قولا بسمو الجنس الاوربي على باقي الاجناس هو يقولو لينا كيفاش نتعاملو مع شعبنا.

افتتاحية بحقارة حيدات دولة على قدها. قتلات مجتمع متحرك وشعب فيه تيارات واتجاهات. كلشي ما صالح لوالو. خاص الحماية والوصاية عليه. حقاش المغربي عند هادو ما كيفكرش. كلشي خاصو يدار فاوربا فبروكسيل ومدريد وبرلين وباريس.هنا ايلى تشد صحافي راه حقاش ضد النظام واخا تكون شكاية ديال بنت تتهمو بالاغتصاب وهما لا تشد عندهم امثال طارق رمضان بتهم الاغتصاب ما يمكنش تشكك فهاد الشي.

نظرة كتقاسمها نخبة انتهازية. عايشة الحياة ما كتخلصش حتى الخدامة اللي معاهم حقوقهم وباش يوصلهم هاد المقال يرسلوه كيف دار ملايري كان عند بوه احتكار للمضربات والناموسيات كثر من خمسين عام.

كيفاش توصل الحقارة بهادو حتى يعجبهم مقال بحال هادا. مقال كيسبهم هما. كيسب المغربي. كيدعو لوصاية على هاد الشعب.
تفو على كمامر. بلادنا هادي. حنا وكل واحد من موقعو يحاول يقادها باش تدخل نادي الديموقراطية وتحقق النمو. ولكن بولاد المغرب بافكار لمغاربة ماشي باملاءات عنصرية اوربية