وكالات//

الدكتور هوارد تاكر الميريكاني، خذا لقب أكبر طبيب في العمر في العالم، ودخل لموسوعة كَينيس للأرقام القياسية، لأنه مازال كيمارس مهنة الطب وهو عندو 100 عام.

الطبيب الميريكاني هو متخصص في الأعصاب بدا الخدمة ديالو بعدما تخرج في ربعينيات القرن لي فات، والحفيد ديالو هو لي قدم ليه لموسوعة كَينيس، وبالفعل لقاتو هو أكبر طبيب في لعمر مازال كيمارس المهنة لحد الآن.

المخرجة تايلور تاغليانيتي قالت أنها بالتعاون مع حفيد الطبيب غادي دير فيلم وثائقي سميتو  What’s Next، لي غادي تعاود فيه قصة الحياة المهنية لهاد الراجل، وكيفاش بعد هاد لعمر مازال كيمشي 2 مرات للعيادة ديالو في السيمانة باش يمارس المهنة.

وبالموازاة قرر الطبيب هوارد تاكر أنه يفتح قناة على “التيك توك” باش يتواصل مع الناس عن طريق الفيديوهات، ويعاود ليهم التجربة ديالو.