وكالات//

ودّعات مزرعة التماسيح فولاية كولورادو فميريكان واحد من أشهر النجوم ديالها، التمساح “موريس”، اللي كان معروف بزاف وشارك فعدد من الأفلام والبرامج التلفزية، من بينهم فيلم الرعب “التمساح” فـ1980، وفيلم الكوميديا “هابي جيلمور” فـ1996. موريس توفى بسبب التقدم فالعمر، وكان عندو أكثر من 80 عام.

جاي يونغ، اللي هو مول المزرعة ومديرها، واللي كاينة فبلدة موسكا فكولورادو، أكّد خبر الوفاة فواحد الفيديو دارو فالسوشيال ميديا، وبان فيه كيربّت على راس موريس بحزن، وقال: “عاش حياة زوينة هنا، وتوفى بسبب الكبر. عارف باللي كاين اللي غايشوف هادشي غريب، ولكن حنا مرتبطين بالحيوانات ديالنا”.

وقال يونغ أن موريس بدا عليه شي سلوك ماشي عادي قبل ما يموت، بحال فقدان الشهية وما بقاش كيتفاعل بحال العادة. وزاد قال إن فقدان الحيوانات اللي كتعزّها من أصعب اللحظات، ولكن موريس “مات فسلام”.

موريس بدا المسيرة ديالو فهوليوود فـ1975، ومن بعد شارك فعدد من الأفلام المعروفة، بحال “التمساح” فـ1980، و”التمساح 2: الطفرة” فـ1991، وحتى ففيلم “مقابلة مع مصاص دماء” فـ1994. وشارك حتى ففيلم العائلة “دكتور دوليتل 2″ فـ2001، و”بلوز براذرز 2000” فـ1998، ومن أشهر الأدوار ديالو كان ففيلم “هابي جيلمور” فـ1996 مع النجم آدم ساندلر.