‎‎كود سبور//

أكد الحسين عموتة، مدرب الوداد الرياضي، أن الفريق الأحمر مستعد لمواجهة ريفرز يونايتد النيجيري فماتش روتور دور 32 من دوري أبطال إفريقيا الأحد الجاي فستاد دونور، من أجل التأهل لدور ليكروب، وأن الجماهير الودادية غيكون عندها دور فهادشي.

وقال الحسين عموتة، فتصريح صحافي قبل الماتش، “حنا واعيين بالمسؤولية  الكبيرة اللي علينا فالماتش ضد ريفيرز يونايتد النيجيري، حيث هذا ماتش ديال التأهل لدور ليكروب”.

وأضاف عموتة: “الظروف اللي لعبنا فيها ماتش الألي فنيجريا كانت صعيبة من ناحية التيران والطقس، وحتى جمهور ريفيرز دار لينا مشاكل، وكان كيبرزطنا فالتيران، وكان يضغط علينا وكايضغط على الحكم، اللي دار أخطأ تحكيمية ومنها جاء البيت ديال التعادل اللي ماركاو علينا، وضربة جزاء ديال محمد اوناجم اللي ماتحسباتش لنا”.

وشدد الحسين عموتة: “حنا دابا كنلعبو فالتيران ديالنا وعدنا الإمكانيات باش نتأهلوا لدور ليكروب، ولكن خاصنا نبقاو مركزين ومكالميين، وغادي نخلقو الفرص لكن خاصنا نبقاو مركزين ومانطيحوش فالتسرع، وخاصنا نساليو الفرص ديالنا بشكل جيد ونحاولو نماركيو البيت الأول ومن بعدها نماركيو الثاني والثالث باش نضمنو النتيجة، وكنتمناو نكونو فالموعد وبحضور جمهورنا غادي نتأهلو”.

وغادي يكون الوداد الرياضي مطالب بتحقيق الانتصار على ريفرز يونايتد النيجيري فماتش روتور ديال دور 32 من دوري أبطال إفريقيا، بهدف واحد لصفر على الأقل، باش يتجاوز الخسران ديال ماتش الألي فنيجريا بهدفين مقابل هدف واحد ويتأهل ليكروب من المسابقة.