كود -BFMTV //

السلطات الفرنسية بينات تفاصيل عملية كبيرة دارتها ضد شبكة إجرامية معروفة باسم DZ Mafia، ولي هي وحدة من أبرز الشبكات اللي كيدير تهريب المخدرات فمدينة مارسيليا، العملية توصفات بأنها ممسبوقاش، حيث شاركو فيها تقريبا 900 بوليسي وجدارمي.

هاد الحملة الأمنية اللي دارت فبداية السيمانة ، جات بعد تحقيقات طويلة على أنشطة الشبكة، ونتج عليها توقيف 42 واحد فعدد من مناطق جنوب فرنسا، بحال بوش-دو-رون وفار وفوكلوز وغارد، على أساس أنهم متورطين فالجريمة المنظمة والاتجار بالمخدرات.

وكيل الجمهورية فمارسيليا  Nicolas Bessone قال نهار السبت 14 مارس، أن القضاء قرر يتابع  26 واحد واحد فهاد  الملف، ومن بينهم 15 تحطو فالحبس الاحتياطي، و11 خلاتهم المحكمة تحت المراقبة القضائية حتى تكمل التحقيقات.

المعطيات بينات أن من بين المتابعين 9 العيالات ، وهاد الشي اعتبروه المسؤولين دليل على ان العيالات ولاو حاضرات  فشبكات الاتجار بالمخدرات” ،اما  20 واحد من المتهمين لي جاو من مارسيليا مؤشر على أن الريزو محلي.

المعلومات بينات حتى أن متوسط عمر المتابعين فالقضية تقريبا  28 عام، هاد العمر كيبين أن الشبكة ما كتستعملش غير القاصرين ولا الشباب الصغار، ولكن  حتى الناس الكبار شوية فالسن اللي عندهم مناصب مهمة فالتنظيم.

ومن بين الموقوفين كاين حتى محامي اللي كيشتبه فيه أنه عاون واحد القيادي ديال الريزو اللي كان فالحبس باش يتواصل مع الخارج، مني استعمل وسائل مرتبطة بخدمتو، بحال المراسلات السرية ولا pc ديالو.

وحتى عالم الموسيقى كانو فيهم متورطين ، حيث من بين المتابعين مغني الراب Dika اللي مشا تحت المراقبة القضائية، ومغني الراب KITKVT اللي تحط فالحبس الاحتياطي، والتحقيقات ما زال مستمرة باش يعرفو باقي خيوط الشبكة الإجرامية.

https://www.bfmtv.com/police-justice/un-avocat-deux-rappeurs-9-femmes-quels-sont-les-profils-des-mis-en-examen-dans-le-vaste-coup-de-filet-de-la-dz-mafia_AD-202603140201.html