كود سبور//

ما غايلعبش عمر عرجون فينال كأس الكونفدرالية الأفريقية لكرة القدم مع نهضة بركان ضد الزمالك المصري لا فلالي لا فالروتور.

وتوصلو نهضة بركان حسب مصادر مطلعة، بمراسلة من الاتحاد الإفريقي لكرة القدم كيأكد لهم فيها أن عمر عرجون ما غايلعبش الفينال ضد الزمالك المصري بسبب الحمرا اللي كان خدا فروتور ربع النهائي ضد بوسليم الليبي، وأن القانون ما كيعفيش اللاعب المطرود من العقوبة فحالة إلغاء الجوج ماتشات اللي من ورا الماتش اللي تطرد فيه.

وكان عمرو عرجون مستبعد من لاليست ديال نهضة بركان ضد اتحاد العاصمة الجزائري فلالي وروتور الدومي فينال، بسبب الطرد اللي عندو ولكن الماتشات بجوج ما تلعبوش بسبب اعتراض الفريق الجزائري على توني نهضة بركان بتحريض من السلطات الجزائرية.