كود سبور//

نفى الدولي المصري عمرو وردة اللاعب السابق للرجاء الرياضي، كل ما روجاتو الصحافة ديال بلادو بخصوص أن فريق فاركو المصري حتى هما جراو عليه.

عمرو وردة خرج فتصريح على قناة Mbc مصر، وقال بلي هذا الشي اللي كيروج من أخبار حول الانفصال دياو على فاركو المصري ماشي بصح.

عمرو ورة بدا كيبكي وكشف أنه مريض نفسيا وهاد الشي من أيام فاش كان فالرجاء الرياضي الصيف الماضي وأنه كيتعتلج دابا من الاكتئاب وأن الرجاء تعاملو معه مزيان.

واللاعب المصري فالخرجة ديالو بدا كيبكي وهدّد أنه يخرج من مصر إذا بقاو الناس تابعينو بالكلام والهضرة، وكيشوف فراسو ضحية ديال حوايج ما درهومش، خصوصا وأنه كان فالمنتخب وجراو عليه.

وكيتعتبر عمرو وردة من اكثر اللاعبين المثيرين للجدل فالعالم وماشي فمصر او افريقيا او عربيا، واللاعب مشهور بحوادث التحرش الجنسي اللي كانت سبب فالطرد ديالو من منتخب مصر.

وكان عمرو وردة مول 29 عام، سنا مع الرجاء الرياضي الصيف الماضي مدة عام، وتفارقو معه حيث بان لهم السيد ماشي عادي، وبعدها مشى لقبرص وسنا مع فريق وتفارق معه بعد أيام ومن وراها مشى لإيران وسنا مع فريق وتفارق معه بعد أيام واخيرًا وقع مع فاركو المصري فين كاين دابا، واللي خرجت أخبار البارح كتقول أنهم تفارقو معه حتى هما.