كود: الجديدة//

علنو عمال النظافة فمدينة الجديدة أنهم غادي ينظمو وقفة احتجاجية قدّام عمالة الإقليم، غدا الاثنين 11 غشت 2025 مع الثانية بعد الزوال، باش يحتجو على ما سموه بـ”تماطل” شركة (أرما مازكان) المفوّض ليها تدبير قطاع النظاف ة، فصرف الخلاص ديالهم.

العمال قالو فمراسلة بعثوها لعامل الإقليم، أنهم ما توصلوش بالأجور ديال 14 يوم خدمة، وزيد عليها العطل السنوية اللي باقا معلقة، رغم أنهم دارو بزاف ديال المراسلات والاتصالات مع المسؤولين، من بينهم باشا المدينة وبلدية الجديدة.

المحتجين وضحو أن الكونطرا اللي كتربطهم بالشركة سالات مدة الصلاحية ديالها من 9 شهور، وما كان حتى شي تسوية أو صرف للمستحقات.. وزادو وأكدو أنهم مستعدين يديرو سلسلة ديال الوقفات والإضرابات اللي كيضمنها قانون الشغل، حتى يستاجبو لمطالبهم.

وطالبو عامل الإقليم يدخل بشكل مستعجل باش يحل المشكل، ويعطيهم الخلاص ديالهم اللي بقا فالذمة، وأكدو أن هاد الاحتجاجات غادي تبقى وسيلة باش يدافعو على الحقوق ديالهم وعلى لقمة العيش ديالهم