أنس العمري -كود///
علمت “كود” أن عمالة مقاطعات الدار البيضاء- أنفا عطات 10 آلاف درهم لكل أسرة من لي كانوا ساكنين في العمارة لي طاحت في بوركون بالدار البيضاء.
ووفق المعطيات لي توفرات لـ”كود”، فإن المبلغ تمنح للأسر باش يكريو، فانتظار يتلقى حل بخصوص العمارة المنهارة، ولي التحقيق مازال مستمر لتحديد المسؤوليات حول المتسبب في هذا الحادث.
وعند العمالة سيناريوهات عديدة ممكن تخدم عليها لمساعدة سكان العمارة باش يسترجعو فأسرع وقت ملكهم العقاري، ومنها البحث عن سبل إعادة بناء العمارة من جديد وتسهيل الإجراءات أمام هاد العملية.
وهادشي لي كيجري الاشتغال عليه لتقليص زمن معاناة هاد الأسر، لي عندها خيار رفع دعوى على المتسببين في هاد الكارثة، ولي جزء من المسؤولية فيها كتحملو العمالة لأنه كان تقصير من طرف السلطات فمراقبة وجود إصلاحات بهذا الحجم، ولي من الصعيب أنه ما كانش ليها صدى وآثار ومظاهر كتبين إنجاز أشغال ثقيلة في المبنى.
