كود -كازا //

المغرب عرف واحد الارتفاع كبير فاستيراد البيستاش، هادي 6 سنين وهو كيطلع من 2019 حتى 2025، واردات البيستاش زادت 11.5 مرة، بمعدل نمو سنوي وصل حتى ل 50%، وهدي نسبة كبيرة بزاف.

مريكان باقا حاكمة السوق وكتوفر 92% من واردات المغرب فـ2025، تركيا ولات ثاني أكبر مورد، حيث الصادرات ديالها زادت 3.5 مرة مقارنة مع العام اللي فات، وإيران كتساهم غير بـ2.2% من مجموع الواردات.

الطلب على البيستاش فالأسواق وكترة الاعتماد على الاستيراد خلات الحكومة تهتم بزراعة الفستق داخلياً، فالإطار ديال الاستراتيجية الوطنية “جيل أخضر 2020-2030″، البستاش تم تصنيفو كمحصول مهم باش نوّعوا الزراعة فالمناطق القاحلة.

البيستاش كيصدق فالمناطق الناشفة بحال ورزازات، زاكورة ومراكش، حيت الحرارة طالعة والتربة الصخرية والرملية كتعطيه القدرة باش يتحمل قلة الما، المساحة المزروعة دابا تقريباً مابين 2000–2500 هكتار والإنتاج السنوي المحلي كيوصل لبين 150–200 طن، هادشي مازال قليل مقارنة بالاستيراد ،باش نقللو الاعتماد على الاستيراد ونزيدو الإنتاج المحلي خاصنا نوصلو لعشرالاف طون فالمستقبل القريب.