محمد سقراط-كود///

على ما يبدو أنه قالب تريد أن تنصبه السلطات للعزاب والعازبات باش يشدوهم قيطي بالجرم المشهود، حيت راه لا منطقية كيفاش تطلب من لوطيلات مايبقاوش يطلبو عقد الزواج ولكن في نفس الوقت النص القانوني لي كيعاقب أي جوج مارسوا الجنس خارج إطار الزواج باقي في القانون المغربي وخدامين بيه في المحاكم، راه شي حاجة ماراكباش تم، حيت الموشكيل من الأصل عمرو كان مع الفنادق بل مع القانون والسلطة التنفيذية ومع البوليس والجوندارم والبركاكة، إلى كان كوبل يمكن ليهم يشدو لوطيل بلا مايهدر معاهم تاواحد إذن حتى الأستاذة ديال إيجوكاك من حقها تدخل صاحبها للدار وهادوك الناس لي تجمعوا ليها قبالت الدار وحيحوا حتى جاو الجوندارم داوها هي وصاحبها خاصهم يتشدوا بتهمة الاعتداء على مسكن الغير.

راه مايمكنش هاد التخربيقة لي وقعات والناس لي مع وضد قرار وهمي هوائي معندو حتى قيمة مادام أنه مكاينش نص واضح مكيجرمش العلاقات خارج إطار الزواج، غادي تبقى الأمور بحال الشراب وصافي هاهو كيتباع ويمكن تشرب حياتك كلها ولكن إلى غادي بالميكة ووقفوا عليك الصقور يمكن يديوه ليك أو يديوك معاه تدوز تمنية وربعين ساعة ديالك، بينما مايمكنش توقع ليك ونتا غادي بالحليب أو أو بقرعة دلما وهادي هي هانية ديال بصح وقانونية ويجوز، ماشي هاد القرار لي مكاين حتى دليل عليه، غير هكاك عرف كغيره من الأعراف الأخرى لي كتخلي البلاد عايشة فسكيزوفرينيا متعرفنا واش بلاد حداثي ولا رجعي، عندنا سلوكات الحداثة مع قوانين الرجعية.

هاد الحالة ديال بين البينين عندنا كثيرة بزاف في المغرب، أولها الشراب عادي تشريه وتستهلكوا ولكن يمكن يتحكم عليك في أي لحظة، وكذلك المساكنة بزاف ديال الكوبلات ساكنين مع بعضياتهم وما مسول فيهم حد ولكن نهار غير يتخاصمو أو يقربلوها يجيو البوليس يديوهم بالفساد، بينما كون كانوا مزوجين يردخ ليها راسها مع الأرض مايطلعوش حتى الجيران يفكو بدعوى مراتو بينو وبينها، كذلك إيندرايف والنقل بالتطبيقات عموما الشركة داخلة للمغرب حالة فرع ديالها الإشهارات ديالها في مداخل المدن وفي المواقع والأنترنيت بالدارجة وموجهة للمغاربة، وفي نفس الوقت ممنوعة ومن حق الطاكسيات يباراكيوها ومن حق المخزن يدي الطوموبيل للفوريان بدعوى النقل السري، أي هي كاينة في الواقع ولكن كاين نص قانوني واضح كيعاقب عليها يقدر يخرج فيك فوقاش ماجابتها الوقت، إيوا آش هاد المنطق واش البلاد غادي تمشي بهاد الضبابية في كولشي، بغينا فصل واضح وصريح ويخرج في الجريدة الرسمية ديال يمكن لأي جوج بالغين أو كثر يمارسوا الجنس خارج إطار الزواج بلا مايعاقبهم القانون، هاد الوضوح لي بغينا ماشي قرار هوائي مكاين حتى دليل عليه من غير العنعنة ديال قالي واحد صاحبي خدام في لوطيل راه قالو ليهم ماتسولوش على العقد.