كود – وكالات//

واحد الدري صغير قدر يدير اللي ما قدرش يديرو لا عطب تقني لا سوء الأحوال الجوية مني وقف رحلة جوية كاملة وخلا عشرات الركاب يأجلو سفرهم

القصة وقعات نهار الخميس 6 غشت 2026 فوق الرحلة PD444 ديال شركة Porter Airlines، اللي كانت مبرمجة تمشي من فيكتوريا لتورونتو، الطائرة كانت متوجهة للمدرج باش تقلع، ولكن الطاقم لاحظ أن طفل صغير واقف فوق الكرسي ورافض يجلس ويربط حزام الأمان.

الأب حاول يقنعو، ومن بعد الأم، وحتى طاقم الطائرة دخل على الخط، ولكن الطفل مبغاش يديرها،وبما أن احترام تعليمات السلامة وسط الطائرة ماشي مسألة اختيار، قرر الطاقم يرجع الطائرة للبوابة.

الطفل والعائلة ديالو هبطو من الطائرة، ولكن المفاجأة  أن الرحلة تلغات بالكامل، والركاب الآخرين اضطروا يستناو حتى نهار التاني باش يكملو سفرهم.

شركة Porter Airlines اعتذرت للمسافرين على الإلغاء والاضطرابات اللي تسبب فيها هاد الموقف.