سعيد بوناصر – كود //

راسلات الجمعية المغربية لحقوق الإنسان فرع الناظور، كل من مدير السجن المحلي فالمدينة، والمدير العام لسجون المملكة، حول واقعة تعذيب واحد المحابسي طلبات الوالدة ديالو المؤازرة من هاد الجمعية الحقوقية.

وحسب المراسلة اللي توصلات “كَود” بنسخة منها، وتصيفطات لكل من الوكيل العام دمحكمة الاستئناف فناظور والمدير العام المندوبية سجون المملكة المغربية، ومدير السجن المحلي ب”سلوان”، جا فيها بللي السجين المسمى “ق.م” وحسب اللي أكداتو الوالدة ديالو، قالت بللي ولدها تعرض للسب والشتم والتعذيب الجسدي من طرف موظفين ديال المؤسسة.

هاد الاعتداء حسب المصدر نفسو، قال بلي تسببلو فتبول على راسو وفقد الوعي، بسباب العصى اللي كلاه، وهادشي أكدو للجمعية الحقوقية، حسب المراسلة.

ونبهات الجمعية الحقوقي فمراسلتها للأوضاع اللي كيعيشوها السجناء ديال المؤسسة المذكورة، وطالبات الجهات المعنية باش تتذخل وتفرض احترام القانون وحقوق الإنسان، بحيث أن هاد الاعتداء كيجرمو القانون حسب الفصل 231 من القانون الجنائي المغربي. وفق ماجاء في المراسلة.