وكالات//

فواحد الدراسة جديدة ومثيرة، واحد الفرقة ديال الفيزيائيين من جامعة ماساتشوستس أمهيرست (UMass Amherst) توقعو بلي كاينة 90% ديال الفرصة باش نشوفو انفجار ديال واحد الثقب أسود فالعشر سنين الجايين؛ وهاد الحدث الكوني ممكن يبدّل بزاف فالفهم ديالنا للكون.

وحسب موقع “ساينس ألرت”، العلماء كيضنو بلي هاد الانفجارات ممكن تكون ناتجة على ثقوب سوداء بدائية(Primordial Black Holes) اللي تشكلو مباشرة من بعد الانفجار العظيم. وخلافاً للثقوب السوداء الكبار اللي كنعرفوهم، هاد الثقوب البدائية صغار بحال الكويكبات، وكتقدر تبدا كتتبخر بشوية بشوية فواحد العملية اللي سماها العالم ستيفن هوكينغ “إشعاع هوكينغ”، وتنبّأ بيها فـ1974.

فحسب هاد النظرية، الثقب الأسود كيبدا كيخسر الكتلة ديالو مع الوقت حيث كيطلق الجسيمات، ومنين كيقرّب يسالي كينفجر بحال النجوم، وكيطلق مجموعة من الجسيمات اللي كاينين فالكون، ومن بينهم حتى جسيمات مازال ما اكتشفناهمش، بحال المادة المظلمة، أو حتى شي جسيمات ما معروفيش نهائياً.

قبل، كانو العلماء كيضنو بلي هاد الانفجارات نادرة بزاف، كتوقع مرة فكل 100 ألف عام، ولكن الدراسة الجديدة كتقول بلي ممكن توقع كل عشر سنين، وهادشي يعني أننا قريبين بزاف باش نشوفو أول انفجار من هاد النوع، خصوصا بالتلسكوبات اللي كتخدم بأشعة گاما واللي كاينة دابا.

الباحثين حتى قالو تفسير جديد، وهو أن بعض هاد الثقوب السوداء ممكن يكونو فيهم شحنة كهربائية، ناتجة على واحد الجسيم النظري اللي سموه “الإلكترون المظلم”، اللي هو نسخة أثقل من الإلكترون اللي كنعرفو. وهادشي ممكن يخلّي التبخر يتأخر، وهادي فرصة باش نلحقو نشوفو الانفجار دابا.