الرئيسية > آراء > علاش هاد الحرب كلها على الباطرونا من طرف الاستقلال راه على 1.5 مليار دولار. هولدينگ الرشيد والاستثمارات الأمريكية خلاتهم يطمعو فكلشي
17/02/2021 17:01 آراء

علاش هاد الحرب كلها على الباطرونا من طرف الاستقلال راه على 1.5 مليار دولار. هولدينگ الرشيد والاستثمارات الأمريكية خلاتهم يطمعو فكلشي

علاش هاد الحرب كلها على الباطرونا من طرف الاستقلال راه على 1.5 مليار دولار. هولدينگ الرشيد والاستثمارات الأمريكية خلاتهم يطمعو فكلشي

كود علي الصافي العيون //

حزب الإستقلال فالصحرا غادي بطريقة تدبير خايبة بزاف أثرات على وضعيتو وحضورو فالمشهد السياسي، وبنفس الخطوة غادي حتى فمجال الإقتصاد والأعمال والإستثمار وباغي يتحكم فكلشي عبر حمدي ولد الرشيد رئيس بلدية العيون.

هادي مدة ماشي طويلة بزاف آل الرشيد دارو هولدينگ كبير بزاف واستثمروا فكلشي حتى للسيما والسطاسيونات شاو فيها بلا نا نهدرو على الأرض والعقار، وهادشي ماشي جا اعتباطي ولا عفوي لأنهم عارفين شنو كاين وشنو غادي يكون، ولكن دارو خطأ كبير فاش خلاو حمدي ولدالرشيد الوحيد فالواجهة، حمدي فالسياسة حمدي فالرياضة حمدي فالإقتصاد والأعمال حمدي شيخ قبيلة، بمعنى مشاو بمنطق تحكمي بالدرجة الاولى لي ما يقدرش أي واحد من المنتخبين يحل فمو او يبان معاه. ما كايناش شي فرصة باش غير يطل شي واحد من أي ثقب فهاد المشاكل كلها.

البارح خرّج ديال حزب الإستقلال بيان كدبو فيه على المغاربة كلهم فاش حذروا من “خطورة سعي الاتحاد العام لمقاولات المغرب تعديل القوانين بهدف حرمان أعضائها الراغبين في الترشح من حقهم الدستوري في الانتماء السياسي الذي يكفله الدستور وجميع المواثيق الدولية تحت ذريعة الحياد، وهو ما يعتبر خرقا لمبادئ الدستور وعملا تمييزيا مخالفا للقوانين” وزاد اتاهم الاتحاد العام لمقاولات المغرب وقال أنه كيدخل “حروب سياسية بالوكالة لفائدة حزب معين، وتفصيل قوانينه لخدمة أغراض سياسية وانتخابوية، وهو ما سيتصدى له حزب الاستقلال انطلاقا من حرصه على الحياد التي تميزت به هذه المنظمة المهنية قبل أن يتم اختراقها من الحزب المعلوم واقحامها في حسابات سياسية”، وهادشي كان ردة فعل على قرار للباطرونا بعدم الجمع بين رئاستها ورئاسة مكاتبها الجهوية وعضوية المكتب السياسي لشي حزب سياسي، وهادشي سبابو الاستقلال بنفسو لي خلا واحد اسمو محمد سالم بنمسعود يدخل حتى هو الباطرونا واخا ما عندو علاقة ولمجرد أنه صاحب محمد ولد الرشيد ولد حمدي، وهادشي الدليل عليه هو فشلو فالانتخابات الماضية فاش سحقوه الجماني فدائرتو فحي العودة وحي الدويرات لي هو مقر لعائلتو. گردعوه بالمزيان ومازال غادي يتگردع فالانتخابات المقبلة فحالة كلفوه بهاديك الدائرة وأبسط استطلاع غادي يبين هادشي.

نرجعو لموضوعنا لي هو الاتحاد العام ديال المقاولات وهجمة حزب الإستقلال عليه. هاد الهجوم عندو تبرير واحد باااااين ويمكن اختصارو فكلمة وحدة هي التحكم. آل الرشيد وبحكم تحكمهم فتدبير حزب الاستقلال واستغلالهم للغطاء الحزبي ويخدمو بيه الأجندات ديالهم. بغاو يسيطرو عاودتاني على الباطرونا. علاش ؟ لأن الاعتراف الأمريكي بمغربية الصحرا وفتح قنصلية اقتصادية فالداخلة خلاهم يحلمو بجنة جديدة فالداخلة، يعني أنهم كيحلمو اقتصاديا لاستغلال هاد الاعتراف والرغبة الأمريكية فالاستثمار لصالحهم ويتحكمو فمفاصل هاد الاستثمارات من بوابة الباطرونا. يعني الغرض من هاد الحرب لي دايرين على الباطرونا هو تحقيق مصالحهم الإقتصادية ويضمنو للخلَف محمد ولد الرشيد مستقبل أكبر بفلوس باه حمدي.

هاد الحرب ماشي جديدة على الباطرونا وسياسة اللهطة الإقتصادية معروفة على حزب الاستقلال فالأقاليم الجنوبية وهي لي غادي تكون سباب فأنه يزيد يتراجع نفوذو فالمنطقة مستقبلا بدل ما يتقوى باش يخدم الساكنة، تانيا علاش كيهاجم الحزب الباطرونا لي فالشمال والشرق، علاش شنو دارو الممثلين ديالهم لي من بينهم هاد محمد سالم بنمسعود إقتصاديا فهاد الفترة كلها لي دازت. ما عمرنا شفناه ظار شي حاجة للمعطلين أو عاون فمشاريع ليهم او دعماتهم الباطرونا. فقط شدوها عن طريقو وبلوكاوها.

زايدون هاد الهولدينگ لي كيقولو عليه وهاد التحارب الاقتصادية ديالهم علاش ما نشوفوش فيها ولاد المنطقة؟ علاش ما يكونش لولاد لبلاد حضور فيها وهوما لي كيقولو انهم بغاو من الدولة تخدمهم. علاش ما تخدموهومش نتوما فشركاتكم وتعطيوهم فرصة باش يبرزو ويديرو مستقبلهم ديرو فيهم مزية وانفاتحو عليهم وخدموهم.

هادو راهم مضاربين على استثمارات امريكية فالداخلة كتفوق 2.5 مليار دولار، وكبداية غادي يتم رصد 1.5 مليار دولار لمشروع “هارماتان”، بالداخلة.

موضوعات أخرى

24/02/2021 19:30

ضروري من إلغاء القوانين اللي كتجرم المثلية وحماية هاد الفئة من العنف الأسري والمجتمعي.. تقرير كحل على أوضاء المثليين فالمغرب فزمان كورونا: تضررو بزاف بسباب حملات التشهير اللي تزامنات مع الحجر الصحي

24/02/2021 18:30

روبرتاج. عصابات “الابتزاز” مازالة فواد زم.. بعد ما طاح رونار ضحية ليهم خبراء وفاعلين حللو الظاهرة عبر “كود”: هاد الجرائم من الصعب القضاء عليها حيت سرية.. وسببها الفقر اللي كيعيشوه ولاد المنطقة