الرئيسية > كود سبور > علاش ما ندافعوش على بلهندة.. حمد الله جبان خلا حتى مشا رونار عاد باغي يهضر.. بلهندة راجل ماعمرو ما سمح فالمنتخب وفوق هادشي كامل كيفزگ التوني
12/09/2019 15:00 كود سبور

علاش ما ندافعوش على بلهندة.. حمد الله جبان خلا حتى مشا رونار عاد باغي يهضر.. بلهندة راجل ماعمرو ما سمح فالمنتخب وفوق هادشي كامل كيفزگ التوني

علاش ما ندافعوش على بلهندة.. حمد الله جبان خلا حتى مشا رونار عاد باغي يهضر.. بلهندة راجل ماعمرو ما سمح فالمنتخب وفوق هادشي كامل كيفزگ التوني

مصطفى الشاذلي – كود سبور//

هاد السيسبانس، لي داير عبد الرزاق حمد الله ما عندو حتا معنا، خرج بفيديو كيهدد فيه بلي غادي يهضر على سبب انسحابو من الكونصونتراسيون ديال المنتخب قبل كأس إفريقيا بمصر.

هاد اللاعب تعامل مع المغاربة، بحال زعما هو المهدي المنتظر وإلا ما كانش مع المنتخب ما يقلعش، والحقيقة أنه جبان خلا صحابو في وقت صعيب ورجع لأسفي باش يتصور في لابلاج ديال الجديدة وينشر التصاور ديالو في الفايس، فالتوقيت لي كيلعب فيه المنتخب الماتشات في مصر.

واش هاد اللعاب يستحق الاحترام والتقدير، بكل تأكيد لا، لأنه ما احترمش التوني ديال المنتخب وما قدرش منافسة قارية كيعول عليها المغرب.

ودابا عاد بأن ليه يهضر على مشكل داز شحال هادي. ما تكلمش منين كان هيرفي رونار هو المدرب، خلا حتى جا مدرب جديد باش يخلق لاسيزاني مرة أخرى.

اش عطا هاد حمد الله للمنتخب حتى ينوض هاد القيامة، ماعمر كان عندو شي دور كبير، ولو كان كايبغي القميص الوطني كون دافع عليه في مصر، لي كانت فيها الحرارة شاعلة. بدل قضاء ساعات طويلة بشواطئ البحر للتفطح والاسترخاء.

الخلافات و”ليكلون” موجودة في جميع المنتخبات وما يتخباش وراها، حتا منتخبات فرنسا والأرجنتين وألمانيا وإيطاليا وإسبانيا فيها ليكلون ولكن حتا لعاب ما هرب من الكونسونطراسيون.

هاداك شي لي حط يونس بلهندة في سطوري ديالو معقول، لأن سؤال الصحافي، لأنه وصف فيه حمد الله افضل مهاجم في العالم. واش هادشي كيقبلو العقل.

اوزايدون بلهندة راجل معمر سمح فالمنتخب في وقت الشدة دائما موجود يلبي الدعوة سواء كانت المباريات في الأدغال الإفريقية أو في المغرب وفوق هادشي كامل كيفزگ التوني في الماتشات كاملين ومعمر ما تكلم على منتخب بلادو بسوء.

وإلا كان مضروب وما لعبش مع المنتخب كيتقلق، لان هذي هي الغيرة الحقيقية على درابو ديال البلاد.

موضوعات أخرى