كود -وكالات//

من بعد العلاقة الجنسية بزاف ديال الرجال كيعاينو من إحساس ديال ضعف مفاجئ فالرجلين وثقل فـالركابي، ولكن هاد الشي فالغالب ماشي مرض، غير ردّة فعل طبيعية ديال الجسم فيها بزاف ديال الأنظمة خدامين فدقة وحدة.

البداية كتكون من الجانب الهرموني حيث من بعد القذف الجسم كيطلق هرمونات بحال الأوكسيتوسين والبرولاكتين، لي كيساهمو فارتخاء العضلات وكيعطيو إحساس ديال الهدوء والثقل فالجسم وفـنفس الوقت كينقصو هرمونات بحال الأدرينالين والنورأدرينالين اللي كيكونو طالعين مع الإثارة، وهاد الانخفاض المفاجئ كيأثر على شدان العضلات خصوصاً فالرجلين.

ومن ناحية العضلات، النشاط الجنسي كيستهلك طاقة مهمة من مخزون السكر فعضلات الفخذ والساق، وكيخلي حتى تراكم ديال حمض اللاكتيك، وهاد الشي كيعطي إحساس بالعيا احقيقي ماشي غير نفسي. وزيد على هاد الشي، كيتبدل توزيع الدم فالجسم؛ حيث فالعلاقة كيكون تركيز أكثر فـمنطقة الحوض، ومن بعد خاص الجسم يعاود يوزعو لعضلات الكبيرة فالرجلين، وهاد التحول كيعطي لحظة ديال الفشل.

أما من الجانب العصبي، فالجسم كينتاقل من حالة ”الاستعداد“ اللي كيكون فيها ناشط بزاف (الجهاز السمبثاوي)،  لحالة “الراحة والاسترجاع” (الجهاز الباراسمبثاوي)، وهاد التحول كيهبط الستريس العضلي بشكل واضح فالجسم كامل.

هاد الحالة غالباً كتمشي فدقائق قليلة وكتكون مؤقتة، ولكن خاص الانتباه إلا بقات كتر من ربع ساعة، أو جا معاها ألم فالصدر أو ضيق فالتنفس، أو كانت قوية ومفاجئة عند ناس عندهم مشاكل فالقلب ولا الأعصاب، فهنا خاص استشارة طبيب.

الحاصول هاد الإحساس هو غير طريقة ديال الجسم باش يرجع التوازن ديالو من بعد مجهود، بحال أي نشاط بدني فيه عيا كبير.