كود احمد الطيب الرباط ///

هاد الصباح ديال لخميس 24 أبريل 2025 صبحات الرياض فالرباط مقلوبة. باينة نشاط دايرو سيدنا. صبنو الشوراع. قصصو الربيع. دارو الباراجات. انتشار كبير للبوليس فكاع المناطق.

https://www.facebook.com/share/v/18cYxQekEQ/?mibextid=wwXIfr

لكن حدا محطة القطار أكدال نايضة بزاف. التسياق والتجفاف وتنقية مضاعفة. لفضيحة هو التعامل مع المسافرين. ما خربهم حد باللي كاين شي نشاط واللي جا دخل من باب المحطة الرئيسي على زنقة الحاج احمد الشرقاوي. يحطك طاكسي او يوصلك شي حد، تتمشى حتى للباب وتلقى بوليس السكك الحديدية مع الجدرامية وافقين. بلغة متشنجة “ممنوع الدخول من هنا”. اييه وعلاش؟ “كاين نشاط ملكي”. رد جدارمي. ايلى كان نشاط ملكي يوقفو المحطة ويعلمو الناس” رد مسافر. قبل ما يرد بوليس السكك “سير من التحت ودخل ماشي من هنا”. جواب غريب. يعني مسموح تدخل للمحطة ولكن من جهة زنقة محمد التريكي. واحد الدورة طويلة ودوز من ممر فيه ريحة البول وحوايج اخرى وتدخل. العبثية انك توصل للبلاصة اللي كيقولو ليك ممنوع تدخل منها. فهم شي حاجة

هاد الشي خلى عدد من الزبناء يمشي عليهم التران. سيدنا ما كيوقفش السير ايلى كان كيدور فمدن المغرب. علاش هادو كيديرو اجتهاد ومن الصباح اي التسعود والامور موقفة. علاش باش صحاب الامن ما يديروش خدمتهم.

هاد التعامل مهين ومتعب للمسافرين. كانو يخبرو الزبناء كلهم بهاد الشي. راه فدخلة زنقة الشرقاوي كان البوليس يقول للمواطنين يمشيو للباب ديال زنقة التريكي. تصرفات اليوم قديمة ومهينة واكيد سيدنا كتقلقو لأنو ديما كيرفضها