كود هناء ابو علي ////

ظاهريا اعتماد صحافيين وصحافيات فتغطية زيارة الدولة٬ اللي بداها ايمانويل ماكرون نهار الاثنين لبلادنا وغادية تسالي اليوم٬ حاجة مزيانة. هاد الشي اللي خاصو يدار. راه ماشي شي فاڤور فالاعلام المغربي. اقصاءهم قبل كان غباء واهانة للي كيقصيو ماشي للمقصيين. المهم كان اعتماد صحافيين. فالحقيقة ما كانش تقديم طلب اعتماد ومن بعد يبثو فيه. اللا. 

وزارة الاتصال اتصلات بصحافيين ومدراء نشر. كان فالمجموع كثر شوية من 20. تقسمو النهار الاول النص دخل للقصر الملكي والنص الثاني دار تغطية لتوقيع الاتفاقيات فدار الضيافة. 

المهم هاد الشي غير باش نوضعوكم فالصورة. غير القضية ماشي كاع الصحف كانت مدعوة. “كود” ما كانتش. ما دارتهاش وزارة الاتصال او الوزير بنسعيد اللي دار كلشي مع مستشارو. “شوف تيفي” حتى هي ما كانتش. “هسبريس” دارو ليهم قالب خايب. دارو اسماء وما عيطوش عليهم وخلاوهم لابسين واجدين لولا تدخل صحاب لعقل. 

لحسن الحظ النشاط كاين فالقصر. يعني وزارة الاتصال دارت لائحتها ولكن باش وصلات للقصر سولو على غايب مواقع اخبارية بحال “كود” و”شوف تيفي” و”هسبريس”.  هاد الشي اللي اكدو مصدر ل”كود”.  بعد هاد الشي كان الاتصال بالمواقع الاخبارية شي 3 سوايع او قل قبل وصول ماكرون لمطار الرباط الاثنين 28 اكتوبر 2024 مع الخمسة ديال العشية. كاين اللي مشى شرا لبسة وكرافاطا وصباط يليق بالتغطية وخلى حوايجو لخراين عند البوتيك وما خداهم حتى الغد

اعتماد نشاط بحال هادا كيكون مصايب ومعروف ومقاد فترة طويلة قبل. وزير الاتصال والثقافة بنسعيد كذب على “كود” باش سولاتو البارح وقال باللي الوزارة اللي دارت “كود” فاللائحة.

اللي دارو هاد لوزير اللي كان خاصو يمشي فالتعديل بسباب غير الصفقات كلها اللي دارتها الوزارة من نهار وصل وكيفاش كيربحوها غير صحابو٬ وهادا موضوع اخر نرجعو ليه فتحقيق بوحدو٬ اللي كان حادگ فيه هو دخل مستشارو لانشطة هاد الزيارة. ما عمر شي وزير قدر يديرها. رئيس الحكومة ما يقدرش يدخل مستشاريه فانشطة مكلف بيها لقصر٬ الا بنسعيد ديما حاضر مستشارو وماشي باش يخدم. اللا. باش يبنضض. رجالات وزارة الاتصال اللي كيخدمو ليل ونهار وفصمت٬ ما تشوفهمش. ناس الادارة ورجالاتها عارفين خدمتهم وحدودهم. علاش يحضر مستشارو ويقصيو صحافيين وهاد المستشار همو الاول يتصور مع شخصيات حاضرة. شوفو التصاور غادي يبان ليكم.

هاد القضية ديال الاعتماد ما خاصش الوزير يتكلف بيها. مدراء الوزارة هما اللي يشرفو بلا تدخل وتزقريق وتنقاز المستشارين لبراهش اللي كيكونو مع شي وزرا ب. لحسن الحظ دخل القصر وقاد الامور