گود سبور//

ما جاش الإسباني خورخي فيلدا مدرب المنتخب الوطني المغربي النسوي، لـ Zone mixte باش يهضر مع الصحافيين من ورا الماتش أميكال اللبؤات وغانا اليوم الجمعة 21 فبراير 2025، فتيران العربي للزوالي بالدار البيضاء.

وفالوقت اللي كانوا الصحافيين كايتسناو مدرب المنتخب المغربي النسوي، خورخي فيلدا يجي للمنطقة المختلطة باش يعطي تصريح حول الماتش ويكشف للجمهور المغربي على جديد المنتخب المغربي للعيالات على بعد أشهر قليلة عن كاس أفريقيا للسيدات “المغرب2025″، الصيف الجاي، وهي المسابقة اللي كايتسناو المغاربة المنتخب المغربي يتوج بها، ما جاش المدرب فيلدا لـ Zone mixte، وما حضرش باش يجاوب على اسئلة الصحافيين، ودازو غير اللاعبات ياسمين المرابط، وسكينة وزراوي، وغزلان الشباك هما اللي عطاو تصريحات على الماتش وبشكل محترف.

خورخي فيلدا المسؤول الاول المنتخب النسوي واللي المفروض يبادر هو الاول للقاء الاعلام لتقريب اكثر الجمهور من الكورة النسوية المغربية، كايخلي الغياب ديالو على Zone mixte،  الشكوك تروج على واش المدرب المذكور خايف يتوجه له شي سؤال حول قضية “البوسة صحا” اللي كان متابع فيها فبلادو اسبانيا، وخدا فيها البراءة، ولو انه دابا الموقف ديالو قوي بزاف حيث بريئ ويقدر يجاوب ويقول ان القضاء الاسباني والعدالة فبلادو نصفاتو، وهذا الشي فحالة توجه له هذا السؤال، ولكن هو اختار ما يحضرش لـ Zone mixte، وهذا التصرف يثير الشكوك خصوصا وانه من مدرب محترف ومستوى عالي وربح كاس العالم.

للاشارة فالمنتخب المغرب النسوي نجح فتحقيق الرباح على منتخب غانا فماتش أميكال بواحد لزيرو، ومازال عند ليكيب ناسيونال ماتش ودي ثاني يوم الثلاثاء المقبل ضد منتخب هايتي.