كود سبور كازا ////

سيدنا فرحان بهاد الرباح. فرحان بفوز المنتخب المغربي الثاني لكأس العرب اللي دارت بفطر بعد فوزو فالفينال على الادرن ب3 ل2. فهاد الفينال كان لافت حضور وزير الداخلية عبد الوافي لفتيت. ما مولفينوش يحضر. ما عمر وزير داخلية بلادنا حضر لحدث كروي كبير بحال هادا. هاد الحدث حضر ليه فقط لفتيت وفوزي لقجع بصفتو رئيس الجامعة الملكية المغربية لكرة القدم. الملاحظ هو ان الوزير الوصي على القطاع محمد سعد برادة وزير التربية والتعليم والرياضة ما كانش حاضر.

لفتيت ماشي غير حضر بل عطى جائزة احسن حارس للمغربي المهدي بنعبيد

طبعا اختيار اللي كيحضر فالفينال قرار حصري لسيدنا. رسل للقطر وزير ماشي سياسي. عقلتو فالمونديال وبالضبط فالماتش الثالث للمجموعات اللي لعبو المغرب ضد كندا كان مشى وزير الخارجية والتعاون مع ياسين المنصوري باطرون “لادحيد” وعبد اللطيف الحموشي المدير العام للمديرية العامة للامن الوطني وباطرون المخابرات الداخلية “ديستي”. هاد المرة سيدنا رسل وزير الداخلية.

سيدنا كان رسل اليوم رسالة تهنئة للمنتخب واشاد فيه للعابة وشكرهم وهدر على “الحضور القوي في المشهد الدولي للطاقات والكفاءات العالية التي تزخر بها بلادنا في المجال، سواء من ناحية الأداء الرياضي أو التأطير التقني أو التسيير الإداري”. فيه اشادة كبيرة بخدمة الجامعة الملكية المغربية لكرة القدم