محمد سقراط كود //////

هاد اليوماين خبر كاذب حول ميزانية تجديد مراحبض قبة البرلمان خلى العديد من الناس ومنهم العقلاء والأفذاذ أنهم يتيقوه ويكتبوا عليه ويستهجنوا الأمر ويسخروا منو كلها بطريقتوا، وفاللخر طلع خبر كاذب جاي من جريدة محترمة ولي عندها مصداقية عند العديد من المغاربة ، وانا براسي واخا مكتبت والو على الأمر ولكن جاني أنه ممكن ويقدر يكون ، واخا الرقم كان كبير جدا ومبالغ فيه ، ولكن ملي كترجع غي للور شوية كيبانليك أنهم دازوا أرقام ديال هدر المال العام مشابهة لهادشي وأن الرقم واخا كبير ولكن ممكن فالمغرب وهذا هو الموشكيل لكبير.

الموشكيل ماشي فهو علاش مخدمناش عقلنا وماتيقناش الخبر لأنه مبالغ فيه وغير قابل للتصديق ، حيث هذا ماشي خبر ارسال المغرب لسفينة فضائية ، وإنما خبر ديال اهدار المال العام وهادي مولفينها وسبقليها تدارت وبأرقام خرافية ، كيفاش مابغيتوناش نتيقوا أنه الطواليطات غيتقاموا بمليار ، وهوما دازوا فضائح كبر من هادشي منهم النجاة ومنهم خدام الدولة ومنهم التفويتات الكبيرة للمقربين ومنهم احتكار أشخاص بعينهم مجالات معينة لقربهم من مصادر القرار ، والإستحواذ على شركات وقطاعات عامة وعلى وتفويت أراضي بالهكتارات لخدام الدولة القدام والجداد ، وشلا حاجات خرى لي خلات خبر الطواليطات بمليار يبدو أنه ممكن فبلد عجائب الفساد هذا.

صدقنا الخبر حيث شفنا ناس متابعين بالفساد المالي والإختلاس وخرجوا من الحبس وباقي مارجعوش ليه ، حيث شفنا أولاد النافذين كيرتاكبوا جرائم ومكيتعاقبوش ، حيث شفنا مخططات ومشاريع كبرى كتدشن وكيكون عندها تاريخ الإنتهاء من الأشغال وكتبقى الأشغال بلا انتهاء لسنوات أخرى ، حيث شفنا فضائح ديال الفساد كانوا جزء منها سياسيين وهاهوما باقين كل عام كيترشحوا أو يقدروا يشاركوا فالحكومة ، هادشي وعدة فضائح أخرى تطبعنا معاها هي لي خلاتنا نتيقوا أنه ممكن تدار صفقة ديال طواليطات بمليار ، حيث المغاربة كاملين عارفين أشناهي كعكلة تفويتات الصفقات العمومية ، وعارفين أن هاد النوع من الفساد ممكن.

كون كنا فشي بلاد بصح مافيهاش بحال هادشي ، مكناش غنتيقوه ولكن للأسف تزادينا فهاد البلاد لي كولشي فيها ممكن إلا أنك تعيش كإنسان بكامل كرامتك هي لي صعيبة نتيقوها ، أنك تعيش وتتقدم فالحياة ماشي تتقهقر هي لي صعيبة ، أنك تمشي تداوى وتلقى سبيطار كيحتارم آدميتك هي لي صعيب نتيقوها ، أنك تركب فتران غادي يخرج فالوقت ويوصل فالوقت هي لي صعيبة ، أنك تقرى وتحصل على شهادة وتلقى خدمة هي لي صعيبة نتيقوها ، أن الفساد ماغاديش يبقى حتى هي صعيبة نتيقوها ، أما أي حاجة عندها علاقة بالفضائح المالية وسوء التدبير وإهدار المال العام فعادي أننا نتيقوها لأنها هي أكثر حاجة ممكنة فهاد البلاد .