كود كازا//
لبارح علنت وزارة التربية الوطنية على نتائج البكالوريا. هاذ الاستحقاق السنوي اللي كيدوز فظروف كيعرفها الجميع وكيتعتبر أهم امتحان اشهادي فمسار التلاميذ و العائلات وحتا الوزارة، كترافقو عدة معطيات ومؤشرات من الضروري نوقفو عندها باش نفهمو واقع التعليم خاصة على المستوى المجالي.
إعلان النتائج كشف واحد المعطيات هامة جدا. الاكاديميات اللي كتاخذ ميزانيات كبيرة هيا اللي جات فمراتب متأخرة، باستثناء أكاديمية العيون اللي كتعتبر أكاديمية صغيرة.
تفحص ترتيب الأكاديميات كيطعي الريادة لأكاديمية الشرق اللي كتحافظ سنويا على مراتب متقدمة ومعاها أكاديمية الرباط وأكاديمية كلميم واد نون.
هاذ الاكاديميات اللي كتحتل المراتب الأولى، كتفتح الباب للتساؤل علاش أكاديمية بحال الدار البيضاء كتمص ميزانية ضخمة وكتوفر على جميع الموارد المالية و البشرية ودعم الوزارة و السلطات المحلية، وكافة المتدخلين كتحتل مرتبة متدنية، رغم أن المؤشرات الاقتصادية كتشكل عامل قوة لهاذ القطب التعليمي الكبير.
ماشي غي أكاديمية الدار البيضاء اللي طاحت فالترتيب حتا أكاديمية بحال بني ملال اللي كتوفر على ميزانية كبيرة كتجي دائما في مراتب متأخرة، رغم أنها تحظى بدعم كبيرة بمبرر الظروف الطبيعية و المؤشرات الاجتماعية، و اعتبارات أخرى.
هاذ الوضع ديال أكاديميات الدار البيضاء و بني ملال هو نفس الوضع اللي كينطبق على أكاديميات مراكش وسوس ماسة وفاس مكناس و إن كان بدرجة أقل.
قراءة ترتيب نسب النجاح وترتيب الاكاديميات حسب هذه النسب، كيبين الفرق الكبير بين أول أكاديمية و آخر أكاديمية وهذا ضرب كبير لجهود إصلاح التعليم و للوزارة، كيفاش الفرق كيوصل لـ 27 نقطة بين أول أكاديمية و آخر أكاديمية كالعيون وبني ملال و لـ 23 نقطة بين أكاديمية الشرق و الدار البيضاء.
فين كاين الخلل و علاش هاذ التفاوت الكبير اللي كيفرض على الوزارة تفتح نقاش عليه.
راه عادي أكاديمية تسبق أكاديمية أخرى ولكن هاذ التفاوتات ديال نسب كبير فهي ناقوس خطر بأن بعض الأكاديميات الجهوية تسير بسرعة السلحفاة وكتوقف قطار الإصلاح مهما كانت المبررات و الأسباب.
بعد هاذ النتائج من المفروض الوزارة دير افتحاص ديال التدبير التربوي و المؤشرات التعليمية و راه عندها معطيات كثيرة تبني عليها، لأنه لا معنى للافتحاص المالي و التلميذ المغربي كتخلا دار بوه كل سنة بتدبير تربوي متخلف بسبب عدم قدرة مسؤولي بعض الأكاديميات على تنزيل برامج الإصلاح واخا فيهم حلان الفم بزاف ورغم دعم الولاة و العمال و انخراط الجميع فورش الإصلاح و لكن علاش هاذ النتائج الكارثية وهاذ التفاوت بين أكاديمية و أخرى؟؟؟؟؟
الجواب خاصو يكون عملي ماشي تبريرات ظرفية يطويها النسيان. هذا ملف خاص يخدم عليه بنموسى يلا كان فعلا جاد في ربط التعليم بالنموذج التنموي.
