كود -وكالات//

النجم البرتغالي كريستيانو رونالدو، لاعب نادي النصر السعودي  قرر يحيد الحليب من النظام الغذائي ديالو بشكل كامل، بناءً على قناعة شخصية بأن الإنسان ما خاصوش يستهلك حليب ديال حيوانات أخرى من بعد الطفولة، هاد الهضرة قالها  الطباخ ديالو، اللي أكد أن رونالدو كيتبع نظام غدائي مضبوط كيخدم به باش يحافظ على اللياقة ديالو.

وخا أنه وصل لـ41 عام، مازال محافظ رونالدو على فورمنو بفضل روتين كزير فيه تدريبات يومية طويلة ونظام غذائي متوازن غني بالبروتين وبلا  السكر والمشروبات الغازية و كيعتمد حتى على الراحة والاستشفاء بالساونا وحمّام الثلج، وهاد الالتزام هو اللي مخليه يبقى فالقمة ديال الأداء ديالو.

الفكرة اللي كيتبناها رونالدو على الحليب فيها جزء من الصحة البيولوجية، حيث غالبية البشر خصوصا فإفريقيا وآسيا  كيفقدو القدرة على هضم اللاكتوز مورا ماكيتفطمو، وهاد الشي كيسميه العلماء “انخفاض اللاكتاز”. من هاد المنظور، تجنب الحليب  كيتماشى مع الطبيعة الجينية لبزاف ديال الناس ،من غير  اللي عندهم استمرارية اللاكتاز لي هو طفرة وراثية شايعة عند الأوروبيين كتخليهم يقدرو يهضمو الحليب بلا مشاكل طول العمر.

من ناحية الأداء الرياضي، الدراسات العلمية  ما تدعمش فكرة الإقصاء الكلي للحليب ومشتقاتو حيت فيهم البروتين طالع  الكالسيوم وفيتامين D، وكلها عناصر مهمة للعضلات والعظام خصوصا مع التقدم في السن.