كود الرباط ///

هادي يومين كان وفد نسائي اتحادي فيه رئيسة المنظمة حنان رحاب وعضوة مكتب هاد المنظمة فدوى رجواني فمدريد. كانت صورة بانت فيها الاتحاديات مع بيدرو سانشيث رئيس الحكومة الصبليونية.

الصورة فيها يد رحاب شادة رئيس الحكومة الصبليونية. سولناها ف”كود” علاش دارت ديك الشدة. فوضحات باللي “هاد الصورة لي ممكن بزاف يعطيوها تأويلات مختلفة، وهادا من حقهم، هي في الحقيقة كتنطلق من عفوية متبادلة، لا من طرفنا، ولا من طرف بيدرو سانشيز”

واكدات باللي رئيس الحكومة تعامل “بمودة كبيرة مع كل الوفود النسائية المشاركة في مؤتمر الأممية الاشتراكية للنساء، ولكن حنا كوفد مغربي، حسينا بلي كاين ترحيب بنا زايد من طرفو”

طبعا هدرات على المشاركة فهاد النشاط وقالت باللي كعضوات فالاممية الاشتراكية اللي ترأسها قبل الراحل عبد الرحمان اليوسفي.

وهدرات على الجانب السياسي او الديبلوماسية الحزبية باش اكدات ان “العلاقات بين الحزبين تطورات مع بيدرو سانشيز” وقالت باللي هاد المسؤول الصبليوني “عندو تقدير خاص لبلادنا، ولي كيعتبر من منظور استراتيجي يؤمن به، أن كل تطور كيوقع في المغرب هو في صالح إسبانيا”

واكدات باللي مشاركتهم كذلك للدفاع على قضايا كبيرة وحيوية بحال القضية الوطنية “الصحرا” لان فيها “تلاقى مع احزاب اشتراكية فالعالم”

وضافت رحاب ل”كود” ما نخبيوش، أن بيدرو سانشيز هو هو الرئيس المقبل للأممية الاشتراكية، ونحن ندعمه، وغنصوتو ليه، وكنراهنو عليه، حيت من مصلحة بلادنا ومن مصلحة المنظمة رئاسة بيدرو سانشيز ليها، وهادشي معنعرفو قيمتو حتى لمن بعد”