كود الرباط ///

ناضت قيامة على جامع المعتصم نائب الامين العام لحزب العدالة والتنمية اللي كان مكلف بمهمة فرئاسة حكومة يرأسها رئيس التجمع الوطني للاحرار عزيز اخنوش.

ناس فالعدالة والتنمية هما للي سربو اسمو باش شافوه شارك فاجتماع دارو رئيس الحكومة مع قيادات احزاب المعارضة في البرلمان.

وفق مصادر “كود” كاينين جوج من العدالة والتنمية خدامين ومرسمين فرئاسة الحكومة. واحد معروف والثاني شوية وصافي. يتعلق الامر وفق مصادر “كود” بمحمد باحو اللي كان موظف مع فريق حزب المصباح فالبرلمان ودابا راه ترسم فرئاسة الحكومة والثاني معروف خدا مناصب كبيرة فالحزب وجماعة الاصلاح والتوحيد وهو سعد لوديي. هادا كان خدم مع مصطفى الخلفي باش كان فوزارة الاتصال وكان هو مدير ديوانو ومن بعد باش ما بقاش فالحكومة مشى عند بنعرفة لرئاسة الحكومة خدم مستشار فديوانو وبقى تماك لاصق حتى ترسم .

هادو ما عمرهم خدمو فالدولة حتى جات هاد الحكومة عكس جامع المعتصم اللي اصلا حياتو كلها وهو فالتعليم غير كان ملحق فرئاسة الحكومة.

وفق مصادر “كود” حتى مصور بنعرفة اللي كان خدام فحزب العدالة والتنمية٬ حتى هو خدام فرئاسة الحكومة.

دابا لفضيحة هما هادو اللي مع الحزب وخدمو وترسمو مع هاد رئاسة الحكومة وحزبهم فالمعارضة وكيهدر على تكافؤ الفرص فالتوظيف والكفاءة ومحاربة الريع و،،، من داك لكلام لكبير