كود علي الصافي الرباط ////

تسربات اليوم 27 دجنبر 2022 رسالة رسلها سيدنا للعاب زكريا ابو خلال. الرسالة بتاريخ لاربعا 21 دجنبر 2022 اي 24 ساعة بعد توشيح الملك للعابة الاسود 26 اللي شاركو فالمونديال بوسام ملكي بدرجة ضابط فيما نال فوزي لقجع رئيس الجامعة الملكية لكرة القدم ووليد الركراكي مدرب الاسود وسام ملكي بدرجة قائد. التوشيح والاستقبال مع امهات اللعابة فالقصر الملكي بالرباط كان نهار لثلاث 20 دجنبر 2022

الرسالة ما عندها علاقة باللي تكتب على هاد اللعاب ابدا. دارت قبل ما هاد التاريخ. ما عندو علاقة باللي تار على الموضوع وجا بعد هاد التاريخ.

نبداو اولا اش فهاد الرسالة اللي مشات ل25 لعاب اخر كانو فمونديال قطر بالاضافة الي رئيس الجامعة فوزي لقجع والمدرب وليد الركراكي؟ فيها “محب جنابنا الشريف السيد زكريا ابو خلال لاعب المنتخب الوطني لكرة القدم” وفيها داك لكلام اللي كيتكرر فالرسائل الملكية كيف كتكون فالاعراف المخزنية العريقة مع امور كتخص اللعاب. هاد الشي ديما كيكون فهاد النوع من الرسائل. هاد الشي كيبان باش تكتب فالرسالة “نود بهذه المناسبة ان نشيد بمساهمتك المتميزة في تحقيق هذا الانجاز الرياضي الكبير وسيحتفظ التاريخ بالهدف الرائع الذي سجلته في المباراة الثانية امام المنتخب البلجيكي والدي فتح باب التأهل امام منتخبنا الوطني”

طبعا هدرات الرسالة الملكية علي “التزام وانضباط” اللعاب و”تشبث واعتزاز بالانتماء لبلدك المغرب والحرص على تمثيله في المناسبات الدولية فضلا عما تتوفر عليه من مؤهلات تقنية وما تتميز به من احترافية وتنافسية تفتح امامك افاقا واسعة للمزيد من التألق” وسالات بهاد العبارة “اننا نعبر لك عن سابغ عطفنا وموصول رضانا داعين الله تعالى ان يلهمك موصول التوفيق في مسارك الرياضي”. التوقيع لمحمد السادس يوم الاربعاء 21 دجنبر 2022

طبعا كيف قلنا هاد الرسالة ما عندها علاقة باللي ثارو موضوع “اشكاين” حول سلفية هاد اللعاب ومن بعد ردات عليه الجامعة الملكية المغربية لكرة القدم والمجلس الوطني للصحافة ونادي “تولوز” اللي كيلعب فيه اللعاب.

هاد الرسالة كيف كتكون الاعراف اثناء توشيح شخصيات من قبل سيدنا٬ فيها ما هو عام وفيها ما هو خاص كيهم المعني بالامر. دابا باش تخرج الجريدة الرسمية غاديين نشوفو اش كتب سيدنا على الحارس بونو واش قال على الحارس لمحمدي واش كتب علي اشرف حكيمي و حكيم زياش وسفيان لمرابط وعز الدين اوناحي……

لمغاربة يبغيو يعرفو تفاصيل توشيح اللعابة لخراين. كيفاش سيدنا كتب لكل واحد فالرسالة بعد التوشيح. سيدنا اللي فرح بهاد الانجاز لكبير وخرج ولبس التوني وكان فرحان بزاف باش استقبل اللعابة وامهاتهم. صور خالدة غادية تبقى عالقة فذهن كل مغربي على هاد الاستقبال. على احاديثو مع الامهات بعفوية وبلا بروتوكول. الام دارت بزاف لهاد اللعابة وتكرمات بطريقة تليق بيها.

دابا اللي سرب هاد الرسالة اللي بغى يدوز ميساج فعلاقة بهاد النقاش اللي ثار على “سلفية ابو خلال”. واخا الرسالة الملكية بعيدة على كاع هاد النقاشات. رئيس الدولة عطى وسام لمواطن مغربي. دابا عطاه بحال 25 لعاب وصلو لنص نهاية كأس العالم٬ وسام من درجة ضابط. يعني ان قدام هاد اللعابة فرصة باش ياخدو وسام من درجة قائد او من درجات اعلى