كود -وكالات//

بزاف دالرجال عايشين غير بفولة وحدة حيث هادي حالة طبيعية متعايش معها الملايين بشكل عادي ولكن واش ممكن يولد بها بنادم؟
هاد الحالة، اللي كتسمى طبيّاً بالفولة الفرادية تقدر تكون ناتجة على أسباب خلقية كيتزاد بيها الشخص، أولا بسبب مشاكل صحية وحوادث كيطروا ليه ف مراحل من بعد الطفولة أو البلوغ. ف جميع الحالات، الطب  كيعطي تفسيرات  وحلول كتخلي لواحد يعيش حياتو بلا خوف

ومن بين الأسباب الخلقية اللي كتخلي الدري يتزاد بخصية وحدة هي مشكل “الخصية المعلقة”، وف هاد الحالة الخصية التانية مَكَتْهْبْطْش لبلاصتها الطبيعية ف كيس الصفن وكِتبقى محبوسة لداخل فالكرش، ويلا مَادَارْش ليها التدخل الجراحي ف الصغر كتدوب وتموت.

عاد كاين مشكل آخر خلقي كيتسمى “متلازمة اختفاء الخصية”، فين الخصية التانية مَكَتْكّوّنْش أصلاً ف مرحلة الجنين وسط الرحم حيت كيكون تقطع عليها  الدم وكتغبر قبل ما يتزاد الدري الصغير.

من الناحية الوظيفية والبيولوجية، هاد النقص مَكِيأثّرْش نهائياً على حياة الراجل اليومية أو الزوجية ،الفولة الوحدة إلا بقات سالمة كتدير واحد الظاهرة طبيعية كتسمى “التضخم التعويضي”، يعني كتكبر شوية ف الحجم وكتولي تخدم ب جْهْدْ مضاعف باش تعوض الخصية المفقودة.

هاد الخصية كتكون قادرة بوحدها على إنتاج هرمون التستوستيرون الكافي للرغبة والقدرة الجنسية، وكتنتج ملايين الحيوانات المنوية الكافية باش الراجل يولد ويدير وليداتو بشكل طبيعي بحالو بحال أي راجل آخر.

أما من الجانب النفسي والمظهر الخارجي، فالطب كيوفر حلول تجميلية سهلة بزاف للناس اللي كيحشمو ويقدرو يركبو بسهولة”الخصية الاصطناعية”، ديال السليكون.