كود -وكالات//

فالتقرير ديالو، قال متحف التحرير فمصر بلي ملي كيدوز الواحد فقاعات المتحف، كيبان ليه أن عدد كبير من التماثيل ما بقاش فيهم النيف وهادشي عندو بزاف د الأسباب.

كيقول المتحف إنه كاين شي تماثيل تضررات بسبب عوامل طبيعية بحال التعرية اللي وقعات من آلاف السنين، خصوصاً وأن النيف أضعف جزء فالتمثال وكيقدر يطيح دغيا، عاد كاين حالات أخرى تهرس فيها النيف بشكل متعمد بسباب الحرب او بسباب لي كيقلبو على الكنوز.

المصريين القدام كانو كيعتقدو أن التمثال يقدر يكون مقر لروح مولاه أو ولا باش يتلقى القرابين فالعالم الآخر، وهاد الشي لي خلا بعض الناس يهرسو النيف ديال التمثال باش، يبلوكيو قدرتو باش يدير هاد الوظيفة الدينية والطقوسية.

وزاد التقرير أن بعض التماثيل تشوهات بسباب الاضطرابات السياسية وحتى الخلفية الدينية، أو بسباب السرقة ديال الكنوز .

المتحف كيقول بلي النيف المهرس، كيكون وراه سبب تاريخي وقصة خاصة كتستحق البحث والتقلاب .