محمد سقراط-كود///
واحد المرة كنت شاد الطريق بين سكورة مداز والمرس في إتجاه سرغينة، داك البلاصة نواحي بولمان فين طلع داك خونا للجبل قاليهم غادي نجبد الكنز وتبعاتو القبيلة كلها، المنطقة كلها أمازيغ وهزيت معايا واحد الراجل كبير في العمر وصلتو للمرس، مكانش كيهدر الدارجة مزيان لسانه أمازيغي، وجبدنا الهدرة على شنو سمية القبايل لي تم، وبقى كيشرح ليا ويسمي حتى وصل لأنهم واخا أمازيغ راهم من سلالة الأدارسة الذين قدموا من المشرق العربي، وأن آيت سغروشن شرفاء من سلالة النبي، ومن غير هاد القصة، حتى أسماء القبائل الأخرى لي كانت في المنطقة فين مايذكر شي قبيلة يقولي جاو من تافيلالت جاو من ليبيا كانوا في الجزائر نواحي بشار وجاو ستقروا هنا، جاو من تونس جابوهم المرينيين، تاواحد مكان تم كولشي جا من شي بلاصة.
وواحد المرة كنت في منطقة آسول واحد الفيلاج جا في الطريق لبن الريش وايملشيل أو تينغير بلا ماتدوز على الراشيدية، البلاصة معروفة بزاف بمعركة جبل بادو وحدة من المعارك الملحمية لي قادتها المقاومة المغربية ضد الإستعمار الفرنسي، في هاد المنطقة كاينة زاوية سبدي بويعقوب وهو ولي من أولياء الله الصالحين وشريف من أجداده مولاي عبد الله أمغار دفين دكالة ومول أحسن موسم في المغرب ولي غنات عليه فاطنة بنت الحسين، وحتى هنا ناس المنطقة بزاف كيظنوا أنهم أشراف خصوصا لي كينتهي نسبهم بسيدي بويعقوب، وأنهم جاو من بلاصة خرى وإستقروا تم هربا من الدولة الوطاسية أنذاك، عموما هاد الفكرة ديال المغرب ماولد حد كولشي سكانه جاو من بلاصة خرى راه مترسخة في الوعي الجماعي للبلاد، ومدعاة للمفاخرة والمباهاة عند شي وحدين، لدرجة فاش كتبقى تسمع هاد القصة كتردد كل مرة وفي كل منطقة كتبدى تسائل، إذن شكون لي كان هنا؟ واش المغرب كان أرضا خلاء وبداو ليها الهجرات وحدة من ورا لخرى حتى تكونات ساكنته الحالية، كيفاش المغرب بلاد فيها السهول والأراضي الخصبة والغابات والتنوع البيئي، والأراضي الممتدة الصالحة للرعي ومكانش مأهول، فين ماتوقف حدا شي أثر أو حجرة يقوليك بناوها وحدين خرين من غير المغاربة جاو سكنوا هاد الأرض السعيدة.
أنا مثلا عائلة الواليد آه جاو من بلاصة خرى للرحامنة، جاو من الصحرا وهادشي غير جديد، ولكن من قبل الصحرا راه مكنظنش كاين شي جينا من اليمن أو شي قصة هاكة، في الغالب غادي نكونوا من الأمازيغ لي سكنوا الصحراء الكبرى وراهم باقين فيها ليومنا هذا، هاد الفكرة المعششة في أدمغة المغاربة ديال أغلبنا جا من بلاصة خرى، واستقر في المغرب للأسف متجدرة بواحد الشكل عجيب، علما أن الإكتشافات العلمية كتقول العكس، راه الناس في بلايص خرى ودول أخرى مشاو من المغرب، وأن المغرب من أول المناطق لي عرفات إستقرار الإنسان العاقل حسب، وحاليا من بعد النيل المغرب تاني مجمع زراعي في تااريخ افريقيا، وهادشي وقع ألاف السنين، إذن علاش هاد العقدة ديال جينا من جيهة خرى باش نبانوا واعرين، حنا كمغاربة راه من جذور الحضارة، خاص تحارب هاد الفكرة ديال كل قبيلة فينا جات من شي بلاصة، حنا كنا هنا والبعض منا مشا عمر بلدان أخرى وكاين لي مشا ورجع بحال المورسكيين كمثال، كانوا هنا ومشاو للأندلس ورجعوا من بعد، ماشي عرق أوروبي مسلم جا استقر عندنا، هادي غير تخربيقة.