كود الرباط//

على تدوينة تعتقل الناشط الحقوقي فؤاد المؤمني.. لكن المتهمين بالتلاعب بالكاش والتبيض وكاع جرائم الأموال الخايبة، باقي متشدوش، متورطين بالأدلة في ملف “كراء الأموال” بالعاصمة وباقي متشدوش. كيفاش وعلاش. “كود” تعاود ليكم القصة.

قبل أشهر قليلة، هرب رجل أعمال رباطي من المغرب، ولد ليسي ديكارت، “ع.أيت س” (واحد من مالين ريسطو كاسا إيما)، ومشا لفرنسا، حيث عندو جنسية فرنسية ومزوج فرنسية، والسبب حسب معطيات حصرية عند “كود” هو “تهديدات تلقاها من صحاب الملايير لي كيكريو الفلوس بنسبة الفائدة كتفوق 30 فالمائة، هاد صحاب الشكارة الصحاح كيعطيو 100 مليون دقة وحدة بـ30 فالمائة ديال الفائدة وتردها فشهر”.

هاد الفيلم تعاود فكازا، غير هو فكازا تشدو مالين الفعلة وفالرباط لا، علاش وكيفاش، كيف كيروجو صحاب اللعاقة فالعاصمة بلي هادو عندهم “كالة صحيحة”، يلا كانت هاد الهضرة صحيحة فخاص نهبطو ريدو ديال استقلالية القضاء.

هاد مول “كاسا يما” باش يحسن صورتو الخايبة مع مافيات كراء الأموال ، مخدم وحدة كتقدم راسها على أنها مصممة أزياء ومؤثرة جابت ضيوف سيدنا فالعشا لي دار على شرف زيارة ماكرون الاخيرة، للريسطو وكدير إشهار بتصاورهم.

جابت ليه جمال دبوز، الفكاهي لي مات ليه الحوت فالبلاد وما بقاش عندو الحفل السنوي اللي كان كيدير فمراكش ديال الضحك ومبقاش صوتو الفكاهي مسموع ففرنسا حيث جات أجيال جديدة فالفكاهة تفوقت عليه.

حتى شريكتو فشركة ايفينموسيل  مبقاتش معه وخرج من الشركة.

ولكن باش تغطي على الفضايح بضيوف سيدنا، راه التخربيق.

خاص يتم فتح تحقيق قضائي نزيه حول شبكة مافيا كراء الأموال بالعاصمة وعلاقتها بهاد الريسطو وكاع العمليات المالية لي كادار فيه.

باش نشرحو ليكم بالتفاصيل، هاد الريسطو كانو كيجيو ليه مسؤولين ساميين فالدولة، كيدعيو شي وحدين بلي مولاه عندو ناسو فالقصر، هادي أكذوبة، حيث كولشي عارف القصر مكيتعاتقش فتطبيق القانون، صارم فكولشي، شوفو غير سيدنا ولا ولي العهد فاش كيدوزو فالطريق، ديما كيوقفو فالضو الأحمر، هادي بسيطة ولكن كتعني المواطنة الحقيقية ومن هنا كيبدا تطبيق القانون.

القصة بدات من نهار حصلت “كود” على تسجيلات صوتية، تفيد بلي كاين حرب بين مالين الفلوس وصحاب التخلويض بالكاش فالعاصمة الرباط، وهاد الحرب باقا مستمرة وتسببت فهروب رجل أعمال وصاحب ريسطو معروف إلى الديار الأوروبية. وهو لي قلنا ليكم سميتو “ع.أيت س”.

وحسب معطيات حصلت عليها “كود”، مالين لفلوس فالعاصمة كيهضرو بلي لافير ديال مافيا كراء الأموال لي وقعات فكازا تعاودات فالرباط، بحيث أنه كاينة شبكة فالعاصمة كتربح ملايين الدراهم ديال الفوائد الشهرية عن طريق كراء الأموال.

القضية فيها الملايير وفلوس كاش كثيرة كتخبا ف صناديق بلا خبار الأبناك، حسب تسجيل حصل عليه “كود”.

مصادر “كود” قالت بلي واحد من هادو لي كيكريو الفلوس بنسبة فائدة كتوصل بين 30 و40 فالمائة شهريا، معروف فالعاصمة وكيروجو عليه بلي حتى حد ميقدر عليه.

هاد القضية ديال كراء الأموال، تسببات فهجرة رجال أعمال وملايرية فكازا وفالرباط، بحيث حسب ما علمته “كود” من ضمنهم صاحب ريسطو بار وبواط دو نوي مشهور كيجيو ليه كبار المسؤولين وشخصيات من عالم المال والأعمال والفن والسياسة، هرب للخارج بسبب التهديدات بالمتابعة القضائية.

المعاملات المصرفية لي بين مول البار وهاد الكرايا ديال الفلوس “المرابين” كتقوم على نسب فائدة طالعا بزاف، كيدفعها المستهلك للمال للكاري مع الاحتفاظ بأصل الدين، عبارة عن شيكات تهدد أصحابها بالملاحقة والمتابعة.

القضية فيها تشريد عائلات غنية وخلاتهم فالضس بسباب هاد الكريدي ديال لفوس بالفوائد لي كتراكم عليهم حتى مكيقدو يديرو والو، خصوصا وأنهم كيحطو شيكات على سبيل الضمان، وهوما كيخالفو القانون بجوج سواء لي كيكري لفلوس ولا لي كياخدهم ويخلص عليهم الفائدة اللي ميمكنش يتقبلها عاقل.

وحسب معطيات “كود”، كيكون ثلاثة أنواع لكراء الأموال فالعاصمة، وبطلها مالين كراء السيارات (الطوموبيلات الواعرين) وبيرو د شونج ومحل لبيع سيارات فاخرة، هاد الانواع بثلاثة كاينين غير فالرباط والقنيطرة والنواحي.

واحد من هادو لي هربو للخارج بسبب الغرق ديال بالفوائد قال لـ”كود”: “كيزيروك بزاف وكيفركعوك، حيث صافي تخشيتي فواحد المعمعة ديال الكريدي بفائدة كبيرة، مثلا واخا ترد الأصل مثلا نرد 100 مليون فشهر كتبقا 30 مليون خصني نزيدها ديال الفائدة يلا مقدرتش كتزاد تولي 60 شهر جاي وهاكا كتراكم”.

وحسب ذات المصادر فهاد الفوائد تقدر تراكم وتوصل لأزيد من 600 مليون سنتيم، كتولي ديك الساعة مفروض عليك تبيع كاع لي عندك من عقارات وأسهم ووو، وفق واحد من هادو لي هربو الخارج.