سهام إباروري- كود

—

من بين الحوايج لي كانلاحظوهم هاد ليامات انو حنا واحد الشعب مانصلاحوش نعيشو فالبرد ! علاش؟ حيت ماكانعرفوش ليه ، غير معدية علينا الطبيعة و صافي ! و من ناحية اخرى ماموجدينش ليه حيت ما عندناش الشوفاج فالديور و الخدامي و الادارات ! بنادم كايدخل البرد و كايدوخ كايولي ماعارف مايلبس ! ماياكل ! مايدير …. لي طلاقيتيه فالزنقة كايقفقف و يبررربررر فحال لاضارب مو الباركينسون.

الرجال هوما المصيبة الكحلة حيت مازال البنات راه كايلبسو الكسيوات و les bas mousse و الشويرطات و كي البرد كي الهصد واخا تاحنا كاتعانيو و لكن راه صافا …

 
الرجال عندنا فالبرد فاش كايبان فيهم داك العرق المبنت الانثوي لي كايحاولو يدفنوه العام كامل! جربي حطي يديك باردين ف قرفادت شي ولد و شوفي داك الصوت الحنين لي كايخرج منو !”اي اح ! ااااي اححح” ….ويتك ويتك على “آآآآييي” كاتقطعو فالقلب ! فيناهوا التفنطيز ديال شهر سبعة و السبوبو و العياقة بقات فالتيشورط و القاميجة محلولة تال السرة ، لي راجل و مزغرتة عليه مو يعري صدرو فهاد البرد و يورينا زغيباتو المكملين …
اللباس مشكلة حيت بنادم كايبقا يلبس حوايج الصيف لتحت و يزيد عليهم حوايج الشتا لفوق !زعما عند بالو عطاها للعين العورة ! الانسان المغربي هو الكائن الوحيد لي كايلبس تيشورط نص كم فالبرد و يخشي تحت منو شي تريكو بالكمام !اين هو الاغراء يا ولد المه****؟اين؟!!!

واحد البلان خطير كايديروه شي دراري كايقولهم مخهم سيرو لبسو الجلابة ! و عنداكم تسمعو الجلابة و يصحابكم شي مولاتي الجلابة بزيوية بالسفيفة لابسها شي بوكوص من هادوك ديال قفطان 2015 ! لا الجلابة لي كانهضر عليها انا هي واحد الجلابة شبعانة غموليه كاضربك منها ريحة الكافور، كاتكون مدفونة عند صاحبونا فالماريو كايخرجها و كاينفضها و كايلبسها ! غالبا كاتكون فواحد القهوي خراوي … و كاتلقاه مصاحب مع شي مونافقة كاتقولو” بيبي كاتجي كاتحمق بالبلدي” …

 
مايمكنش نجبدو الجلابة و مانجبدوش بنت عمها الطاقية ! وشي طاقيات يا خوتي كايضربو هاد الفاتشات !ماشي دوك الطويقيات لي كايلبسو الممثلين د MBC2 ! لا الكائن المغربي كايبغي غير دوك الطاقيات د الصوف شبعانين خملة و باش كايصرعها كايطويها من الجناب! و كايهبطها تالعينين ماكايبقاوش يبانو حجبانو …سارح سارح خاصو غير شي كامانجة بالطارو د كيكوز و يبدا يغني ” العاليداي داي داي …” تحت شي كرمة د الليمون كولا عنبة قد الشهدية على رأي حسن الفذ!

 
واحد الحاجة اخرى كانلاحظوها هي انو بنادم كايبدا يعكز يكرط كولا صباح و كايبدا زعما يخلي ديك la barbe de 3 jours … ماشي عيب غير هوا و كان راه قالو غير 3 جوغ ! ماشي رحلة الشتاء و الصيف من ديسمبر تال مارس و نتا زارع البقولة فوجهك ! و اصلا اللحية راها كاتجي مع بنادم لي عندو الزغب مفرق بطريقة ديموقراطية فوجهو ماشي بنادم لي عندو اللحية مامساوياش كي الكمانجة د “ولد المصباح” ! كاتلقا شوية هنا شوية لهيه زغبة بعيدة على ختها بميات كولوميط ! اللحية ديال الفقها د طايوان … اخي الفلاح اختي الفلاحة راه ضروري تكون اللحية مقادة و مدزوزة باش تعجب الناس !

 
تاواحد ماكايبغي يمرض ! و لكن هدا وقت المرض و الرواح و الانفيلوانزا فالله يجازيكم بيخير لي عندو شي فيروسات و شي بكتيريات يشدهم عندو !راه قهرتونا معاكم ، اخي الفلاح اختي الفلاحة، لا كنتي مروح بلا ماتبقا عنق و بوس فبنادم ! و بلا ماتجي تعاود ليا شنو درتي لبارح فالليل و تقرب ليا لوجهي … يكفي ريحة فمك لي كاتروع ، ماتزيدوناش الرواح راه كاين لي ماعندو صحة ! و سيرتو سيييرتو بلا ماتبقا تهضر و تشارك و نتا نيفك مخنوق … عطي لراسك الراحة راك مريض ، و راه ماكانفهموكش شباغي تقول بالضبط ” بابا و بابا مشاو عزاو فبول الحانوت لي حدانا حيت بات ” زعما “ماما و بابا مشاو عزاو فمول الحانوت لي حدانا حيت مات” وا سير تاتبرا واجي عاود قصة “بول الحانوت” !

اه قبل مانسالي و غير فاطار المستملحات راه مشيت صايبت جباد هاد ليامات بنفاخة و قرعة د سيدي علي صغيرة مقطعة ! ماعرفتش واش فايت ليكم صنعتوه فاش كنتو صغار ! مهم هاداك الجباد راه ديما دايراه فصاكي هاد ليامات و عوالة انشاء الله فين ما يبان ليا شي واحد لابس بانطوفة و خارج كايتسخر بيها و كايغمسها فالغيس و الشتاوات”شلط شلط شلط” غانهبط على مو للعين بجباد ! وااا لبسو سبابطكم و باراكا من العكز!